Kuri uyu wa gatandatu taliki 26/11/2022, mu Karere ka Ngoma kimwe no mu tundi turere habaye umuganda rusange wabereye mu midugudu yose igize Akarere ka Ngoma hamwe n'umuganda ushingiye ku bumenyi wakozwe n'abafundi, abaganga n'abaforomo hirya no hino ku masite atandukanye.

Ku rwego rw'Akarere umuganda wabereye mu murenge wa Remera, akagari ka Kinunga, umudugudu wa Kamvumba, ahakozwe igikorwa cyo gucukura imirwanyasuri kuri Ha7 mu musozi uhananye wa Kamvumba.

Uyu muganda witabiriwe n'Intumwa za rubanda, umutwe w'Abadepite Hon. Depite MUKAMANA Elisabeth ari kumwe na Hon. Depite BAKUNDUFITE Christine bari kumwe n'abagize Komite Nyobozi y'Akarere barangajwe imbere n'Umuyobozi w'Akarere Madamu NIYONAGIRA Nathalie ndetse n'Inzego z'Umutekano zikorera mu karere ka Ngoma.

Hon. Depite MUKAMANA Elisabeth mu gikorwa cy'umuganda wo gucukura imirwanyasuri ku musozi wa Kamvumba mu murenge wa Remera

Bimwe mu bikorwa byibanzweho hirya no hino mu karere ka Ngoma harimo:  Kurwanya Isuri hacukurwa imiringoti, kubaka inzu z'abatishoboye, Kubaka ibiro by'imidugudu n'ibicumbi by'Itorero mu Midugudu, kubaka ingo mbonezamikurire, Kubaka amateme, gusibura imiferege iyobora amazi, gucukura ibyobo bifata amazi, guharura umuhanda no gupima indwara zitandura,

Mu butumwa yagejeje ku baturage bitabiriye uyu muganda, Umuyobozi w’Akarere ka Ngoma Madamu NIYONAGIRA Nathalie yagaragaje ko muri ikii cyumweru mu karere hatangijwe icyumweru cyahariwe ubukangurambaga bwo kurwanya ruswa n'akarengane ku nsanganyamatsiko igira iti: “Twimakaze Indangagaciro zo kurwanya ruswa, inkingi y'Iteramber rirambye”, Ibikorwa by'Ubutabazi bujyanye no kwirinda no gukumira ibiza, aha abturage bakanguriwe kuzirika ibisenge by’inzu zabo, Ubutumwa bw'ikigo cy'irembo bujyanye no kwegereza serivisi za Leta ku baturarwanda,abaturage bashishikarijwe kugana serivisi z’irembo no kuzisaba bifashishije telefoni zabo, ubutumwa bwa Minisiteri y'Uburinganire n'Iterambere ry'Umuryango bujyanye no kurwanya amakimbirane mu muryango n'ihohoterwa rishingiye ku gitsina, Gukangurira abaturarwanda kugira umuco w'isuku n'isukura. Imyiteguro yo kwizihiza umunsi mpuzamahanga w'abafite ubumuga uzaba kuwa 03/12/2022 no gukomeza kwishyura ubukangurambaga bwa MUSA na Ejoheza.

Hon. MUKAMANA Elisabeth yasabye abaturage kwitabira ibikorwa by’iterambere birimo umuganda no gukomeza gushyira hamwe mu kwiyubakira igihugu.

Umuyobozi w'Akarere ka Ngoma Madamu NIYONAGIRA Nathalie yifatanyije n'abaturage bo mu murenge wa Remera mu muganda usoza ukwezi kwa 11/2022

Umuganda witabiriwe n'abaturage ndetse n'abayobozi mu byiciro bitandukanye bafatanyiriza hamwe gucukura imirwanyasuri ku musozi wa Kamvumba

Imirwanyasuri yacukuwe ku musozi wa Kamvumba yitezweho gufata amazi yajyaga yangiza imirima y'abaturage

Abitabiriye umuganda rusange usoza ukwezi kwa 11/2022 bapimwe indwara zitandura ku buntu mu rwego rwo kureba uko ubuzima bwabo buhagaze.