ABAFATANYABIKORWA BA JADF NGOMA BIYEMEJE GUTEZA IMBERE IMIBEREHO MYIZA Y’ABATURAGE

Kuri uyu wa kabiri, mu nama y’inteko rusange yahuje abafatanyabikorwa b'Akarere ka Ngoma bibumbiye muri JADF (Joint Action Development Forum), hashimangiwe ko ubufatanye hagati y’inzego za Leta n’abikorera ari inkingi ikomeye mu guteza imbere imibereho myiza y’abaturage. Iyi nama yitabiriwe n’abafatanyabikorwa batandukanye barimo imiryango itegamiye kuri Leta, abikorera, inzego za Leta n'abahagarariye abaturage.

Muri iyi nama, abafatanyabikorwa bagaragaje ibikorwa bagezeho mu gihe gishize n'ibiteganyijwe mu gihe kiri imbere, byose bigamije gufasha abaturage kuva mu bukene, kongera ubumenyi, guteza imbere ubuzima, uburezi, n’isuku n’isukura. Hanagarutswe ku gukorera hamwe no guhuza ibikorwa kugira ngo hirindwe guhurira ku gikorwa no kugira impinduka zigaragara mu buzima bw’abaturage.

Mu butumwa yagarutseho, Madamu NIYONAGIRA Nathalie Umuyobozi w'Akarere ka Ngoma, yashimiye abafatanyabikorwa uruhare bagira mu iterambere ry’akarere, abasaba kurushaho guhuza ibikorwa no gutanga ibisubizo bifatika ku bibazo byugarije abaturage.

Yagize ati:

“Iterambere rirambye rishingira ku bufatanye. Dufite intego yo guteza imbere imibereho myiza y’abaturage bacu, kandi ibyo tugeraho byose ntitwabishobora tudafatanyije n’abafatanyabikorwa bacu. Turasaba ko ibikorwa byose bigamije gufasha umuturage biba iby’umwihariko byita ku bababaye kurusha abandi, by’umwihariko urubyiruko, abagore n’abafite ubumuga.”

Yakomeje asaba ko habaho gukorera hamwe mu mucyo, gushyira imbere igenamigambi rihuriweho, no kwita ku gukurikirana ishyirwa mu bikorwa ry’imishinga igamije impinduka zifatika zirimo:me

• Gukemura ibibazo by’abaturage binyuze mu bufatanye bwa buri rwego

• Guhanga imirimo iciriritse binyuze mu mishinga iciriritse n’inkunga zihabwa abaturage

• Kongera ubwitabire mu bikorwa by’isuku n’isukura

Iyi nama yasojwe hafatwa imyanzuro irimo kunoza imikoranire hagati y’abafatanyabikorwa n’Akarere, kunoza igenamigambi rihuriweho, no gushyiraho uburyo buhamye bwo gukurikirana ibikorwa byose byateganyijwe muri uyu mwaka.

Abari bitabiriye inama bishimiye ubwitabire n’ubushake bugaragara mu bufatanye bw’inzego zitandukanye, biyemeza ko bazakomeza gushyigikira gahunda z’iterambere zishingiye ku mibereho myiza y’abaturage b’Akarere ka Ngoma.

Umuyobozi w'Akarere NIYONAGIRA Nathalie yasabye abafatanyabikorwa gukora ibikorwa biteza imbere abaturage.

Abafatanyabikorwa batandukanye bari bitabiriye inteko rusange y'Ihuriri ry'abafatanyabikorwa b'Akarere ka Ngoma.