Ibi byagarutsweho mu nama yahuje Umuyobozi w’Akarere wungirije ushinzwe ubukungu, Bwana MAPAMBANO NYIRIDANDI Cyriaque n’abagize komite y’imicungire y’amazi mu karere ka Ngoma hamwe n’abafatanyabikorwa barimo Water for People Rwanda WASAC n’abandi.

Iyi nama yari igamije kuganira ku ngamba no gufatanya mu gushakira ibisubizo ibibazo bikigaragara mu bijyanye no kwegereza abaturage amazi meza, kurengera ibikorwaremezo by’amazi.

Mu ijambo rye, Visi Meya MAPAMBANO yashimye uruhare rwa Water for People Rwanda n’abandi bafatanyabikorwa mu kwegereza amazi abaturage, anagaragaza ko amazi meza ari inkingi ya mwamba mu buzima bwiza, isuku n’iterambere rirambye.

Yakomeje asaba abashinzwe imicungire y’amazi n’abafatanyabikorwa gukomeza gufatanya mu gusana, kubungabunga no gukwirakwiza ibikorwaremezo by’amazi, cyane cyane mu duce dufite ikibazo cy’amazi gikunze kugaragara. Yagize ati:

“Turifuza ko buri muturage w’Akarere ka Ngoma agira amazi meza hafi ye. Ibi tuzabigeraho binyuze mu bufatanye bukomeye, igenamigambi rihamye no kwita ku bikorwaremezo dufite no kubyongera.”

Abitabiriye inama basangije abandi ibyagezweho mu byiciro bitandukanye ndetse banatanga ibitekerezo ku cyakorwa kugira ngo serivisi z’amazi zirusheho kunozwa no kugera kuri bose.

Umuyobozi w'Akarere wungirije ushinzwe iterambere ry'ubukungu MAPAMBANO NYIRIDANDI Cyriaque

Inama yitabiriwe n'abafatanyabikorwa batandukanye mu bijyanye n'imicungire y'amazi mu Karere ka Ngoma.

Abitabiriye inama bunguranye ibitekerezo byarushaho kubafasha kwegereza abaturage amazi meza.