Kuri iki cyumweru taliki 17.12.2023 mu cyumba cy'inama cya Hoteli Scheba mu mujyi wa Kigali, Visi Perezida w'Inama Njyanama y'Akarere Bwana BUSHAYIJA Francis,Umuyobozi w'Akarere Madamu NIYONAGIRA Nathalie n'abagize Komite Nyobozi y'Akarere hamwe n'abandi bajyanama bagiranye ibiganiro n'abashoramari bafite ibikorwa mu karere ndetse n'abahavuka ariko bakorera ibikorwa byabo ahandi baganira ku mishinga y'iterambere no kubereka amahirwe y'ishoramari ari mu karere ka Ngoma.

Bamwe mu bashoramari bavuka mu karere ka Ngoma bakaba bahafite ibikorwa ndetse no mu mujyi wa Kigali bavuze ko iki gikorwa cyakozwe n’ubuyobozi bw’Akarere ari ingirakamaro kuko kigamije kubahuza no kubibutsa gukorera hamwe mu kuzamura iterambere ry’Akarere ka Ngoma. Uwitwa HABAKURAMA Orsete yagize ati: “Twishimiye uyu mwanya twagenewe n’ubuyobozi bw’Akarere kugirango abashoramari duhure tumemyane bityo dufatanye kurushaho guhuza imbaraga n’ubushobozi mu bikorwa biteza imbere Akarere kacu”

Uwitwa HITIMANA Vedaste we yagize ati: “Iki gikorwa ni cyiza kuko mbere na mbere nubwo twese tuvuka mu karere ka Ngoma abanda bakaba bahafite ibikorwa ariko ntabwo twari tuziranye kuduhuza rero tukamenya nibyiza kuko biradufasha kujya inama no guterana ingabo mu bitugu tugashyira ubushobozi hamwe bityo tukazamura iterambere ry’Akarere ka Ngoma”

Umuyobozi w'Akarere Madamu NIYONAGIRA Nathalie yavuze ko iki gikorwa cyakozwe mu rwego rwo kwegera abashoramari bari mu mujyi wa Kigali no kubashishikariza gushora imari mu karere ka Ngoma kuko gafite ibyiza nyaburanga birimo ibiyaga, ibyanya bibereye ibikorwa by'ubuhinzi, imihanda myiza yakwifashishwa mu koroshya ubuhahirane n'ibindi yasoje ashimira abafatanyabikorwa mu iterambere ry'Akarere yemeza ko ubuyobozi buzakomeza gukorana nabo neza no korohereza umuntu wese wifuza gushora imiri mu karere ka Ngoma

Mu gusoza igikorwa cy'uyu munsi Visi Perezida w'Inama Njyanama y'Akarere Bwana BUSHAYIJA Francis yashimiye abagize Komite Nyobozi kubera igikorwa cyiza batekereje cyo kwegera abashoramari no kubagaragariza amahirwe ari mu karere ka Ngoma bityo bikazafasha mu guteza imbere aka Karere.