Kuri uyu wa Gatatu, tariki ya 29 Ukwakira 2025, Umuyobozi w’Akarere ka Ngoma wungirije ushinzwe Iterambere ry’Ubukungu, Bwana MAPAMBANO NYIRIDANDI Cyriaque, yitabiriye inteko rusange y’abanyamuryango ba Koperative COCURIRE ihinga umuceli mu kibaya giherereye mu Murenge wa Remera, hagati y’Akarere ka Ngoma, Rwamagana na Kayonza.

Iyi Koperative ihinga umuceli ku buso bungana na hegitari 240, ikaba ifite uruhare rukomeye mu guteza imbere ubuhinzi bw’umuceli mu Karere ka Ngoma no mu baturanyi bako. Mu butumwa bwe, Bwana Mapambano yasabye abanyamuryango gukomeza gushyira imbaraga mu kongera umusaruro w’umuceli kugira ngo ubuhinzi bwabo burusheho kubateza imbere, anashimangira ko ubufatanye ari bwo shingiro ry’iterambere rirambye.

Yagize ati: “Koperative nk’iyi igaragaza uburyo abaturage bashobora kwiteza imbere binyuze mu bufatanye no gukorera hamwe. Turabasaba gukomeza guhuza imbaraga, gukoresha inyongeramusaruro ku gihe no kubahiriza amabwiriza y’ubuhinzi bugezweho kugira ngo umusaruro wiyongere kandi ubuziranenge bwawo bube bwiza,” 

Yashimye kandi uruhare rwa koperative mu guteza imbere ubukungu bw’abanyamuryango n’imiryango yabo, ndetse n’uruhare ifite mu guteza imbere ubuhinzi bw’umuceli nk’igihingwa gifite agaciro kanini mu karere. Yasabye abayobozi bayo gukomeza gucunga neza umutungo wa koperative no gushyira imbere inyungu rusange z’abanyamuryango.