Mu rwego rwo kurebera hamwe uko ibikorwa by’iterambere rishingiye ku buhinzi bikorwa hirya no hino mu gihugu, abagize Urubuga Ngishwanama rw’Inararibonye z’u Rwanda basuye ibikorwa by’ubuhinzi by’umwihariko uruganda rutunganya inanasi ruherereye mu Murenge wa Mugesera, mu Karere ka Ngoma.

Iri tsinda ryari riyobowe na Hon. Kabandana Marc, umwe mu bagize uru rubuga, baherekejwe na Mapambano Nyiridandi Cyriaque, Umuyobozi w’Akarere ka Ngoma wungirije ushinzwe iterambere ry’ubukungu basuye ubuhinzi bw’inanasi n’uruganda rutunganya uwo musaruro hagmijwe kuwongerera agaciro no mu guteza imbere abaturage bakora ubuhinzi bw’inanasi ndetse n’abakora indi mirimo ibyara inyungu mu ruganda..

Mu biganiro bagiranye n’abahinzi n’ubuyobozi bw’uruganda, inararibonye zagaragaje ko bishimira intambwe imaze guterwa mu guteza imbere ubuhinzi bw’inanasi no kububyaza umusaruro uhamye. Basabye ko ubufatanye hagati y’abahinzi, ubuyobozi n’abashoramari bwakomeza gushyigikirwa hagamijwe gutuma ubuhinzi buba urufatiro rw’iterambere rirambye no kugeza ababukora ku bukire.

Hon. Kabandana Marc yashimye uruhare rw’abaturage n’Ubuyobozi bw’Akarere mu kwihutisha iterambere, ashimangira ko urwego ahagarariye ruzakomeza kuba hafi y’abaturage n’inzego z’ibanze mu kubaha inama no gutanga ibitekerezo bifatika byafasha guteza imbere imibereho myiza y’abaturage.