Kuri uyu wa gatatu taliki 27.04.2023 ku cyicaro cy’Akarere ka Ngoma habereye igikorwa cyo gushyikiriza magare 68 abajyanama b’ubuhinzi bahize abanda ku rwego rw’Akagali mu guteza imbere ibikorwa bw’iyamamazabuhinzi mu midugudu basanzwe bakurikirana umunsi ku wundi. Aya magare bayahawe kubufatanye bw’Akarere ka Ngoma, Intara y’iburasirazuba hamwe n’ikigo cy’igihugu gishinzwe Iterambere ry’Ubuhinzi n’Ubworozi (RAB).

Ni amagare bayahawe mu rwego rwo kubashimira kubera uruhare bagira mu guteza imbere ibikorwa by’ubuhinzi ku mudugudu akaba yitezweho no gukomeza kubafasha kwegera buri muhinzi mu midugudu bakoreramo. Igare rimwe rifite agaciro k’ibihumbi 110,920Frw bivuze ko amagare 68 yaguzwe amafaranga angana na miliyoni irindwi n’ibihumbi Magana atanu na mirongo ine y’u Rwanda (7,540,000 Frw).

Abajyanama b'ubuhinzi bishimiye ko bahawe agahimbazamusyi kazajya kabafasha kwihuta mu ngendo bakoraga bajya kwigisha umuhinzi.

Abajyanama b’ubuhinzi ku rwego rw’umudugudu basanzwe bafite inshingano zijyanye n’ibikorwa by’iyamamazabuhinzi birimo: Gukangurira abaturage guhinga kijyambere bakoresha inyongeramusaruro, gukora uturima ntangarugero (Uturima shuri ku mudugudu) kugira ngo bereke abaturage muri rusange itandukaniro ry’ubuhinzi bwa kijyambere n’ubuhinzi basanzwe bakora muburyo bwa gakondo.

Abahawe amagare ni abajyanama mu bikorwa by'iyamamazabuhinzi bahize abandi ku rwego rw'Akagali.

Mu butumwa yagejeje ku bajyanama b’ubuhinzi bahawe aya magare Umuyobozi w’Akarere wungirije ushinzwe iterambere ry’ubukungu Bwana MAPAMBANO NYIRIDANDI Cyriaque yavuze ko abajyanama b’ubuhinzi ari abantu bafite uruhare runini mu iterambere ry’ubuhinzi ku mudugudu kuko bafasha abaturage gukora ubuhinzi bubateza imbere bakava mu buhinzi bwa gakondo akaba ariho yahereye avuga  ko Leta ishima cyane uruhare rwabo bityo ikaba yabageneye ishimwe rijyanye n’ayo magare yitezweho kuborohereza ingendo bajyaga bakora bajya kwigisha umuhinzi. Yagize ati: “Akarere kacu kazwiho ubuhinzi n’ubworozi bityo twahisemo kujya dutanga agahimbazamusyi gatandukanye ku bajyanama b’ubuhinzi bitwaye neza kurusha abanda harimo n’izi nyoroshyangendo tubashyikirije uyu munsi kugirango tubashimire bityo turabona ko iri gare rizajya ribafasha mugihe bagiye kugira inama umuturage mu buhinzi bwe.”

Umuyobozi w'Akarere wungirije ushinzwe iterambere ry'ubukungu Bwana MAPAMBANO NYIRIDANDI Cyriaque yasabye abahawe amagare kuyafata neza.