Ubuyobozi bw’Akarere bwagiranye inama n’abakozi bashinzwe kwakira abagana urwego ku Karere no ku Mirenge, baganira ku kunoza imitangire ya serivisi, imikorere n’imikoranire myiza mu rwego rwo kurushaho guha umuturage serivisi yihuse kandi inoze.

Iyi nama yibanze ku gusuzuma uko serivisi zitangwa, imbogamizi zikigaragara mu kwakira no kuyobora abagana urwego, ndetse n’ingamba zo kwirinda gusiragiza umuturage binyuze mu gukorera hamwe, kubahana, no kubahiriza amasaha n’inshingano za buri wese.

Umuyobozi w’Akarere wungirije ushinzwe Iterambere ry’Ubukungu, Bwana MAPAMBANO NYIRIDANDI Cyriaque, yashimangiye ko umuturage ari ku isonga rya byose, asaba abakozi kurangwa n’ubunyamwuga n’indangagaciro z’umukozi wa Leta. Yagize ati:
“Umuturage agomba kwakiranwa ikinyabupfura no guhabwa serivisi mu gihe gito gishoboka. Kwitwararika imikorere n’imikoranire ni byo bizadufasha kwirinda gusiragiza umuturage no kongera icyizere agirira ubuyobozi.”

Yakomeje asaba ko hakomeza gushyirwa mu bikorwa ingamba zo kunoza serivisi zirimo gutanga amakuru yuzuye kandi asobanutse ku bagana urwego, guhuza imirimo hagati y’inzego, no gukoresha neza ikoranabuhanga mu gutanga serivisi.

Abitabiriye inama biyemeje gukomeza kunoza imikorere yabo ya buri munsino gushyira umuturage ku isonga mu byo bakora byose batamuhutaza ahubwo umuturage agasobanurirwa amakuru yose ajyanye n’icyo yaje  gusaba, mu rwego rwo gutanga serivisi nziza.