Kuri uyu wa Kabiri taliki ya 6 Gicurasi 2025, mu Nteko y’abaturage yateranye mu Mirenge yose igize Akarere ka Ngoma; Umuyobozi w’Akarere Madamu NIYONAGIRA Nathalie yatangije ku mugaragaro ubukangurambaga bwo kwishyura ubwisungane mu kwivuza bw’umwaka 2025/2026 hifashishijwe sisiteme Imibereho yasimbuye ibyiciro by’Ubudehe.

Ku rwego rw’Akarere, ubukangurambaga bwo kwishyura ubwisungane mu kwivuza mu mwaka 2025/2026 bwatangirijwe mu Murenge wa Gashanda, Akagali ka Mutsindo.

Muri iyi nteko abaturage bahawe ubutumwa burimo: Kwicungira umutekano no kunoza imikorere y’irondo, kubungabunga ibikorwaremezo, kwirinda amakimbirane, kugira insuku yaba ku mubiri n’aho abaturage batuye, kurwanya igwingira mu bana, n’ibindi.

Umuyobozi w’Akarere Madamu NIYONAGIRA Nathalie, yasabye abaturage kureba ko amakuru y’ingo zabo yanditse mu sisitemu imibereho usanga atarimo akihutira kwegera ubuyobozi bw’Akagari bukamufasha. 

Buri muturage ashobora kureba amakuru y’urugo rwe mu sisitemu y’imibereho yifashishije telefoni ngendanwa mu buryo bukurikira *195# agakurikiza amabwiriza.