Kuri uyu wa kabiri tariki ya 30/05/2023 Guverineri w’Intara y’Iburasirazuba CG Emmanuel K. GASANA yafunguye kumugaragaro inyubako nshya mu kigo nderabuzima cya Gasetsa izajya icumbikira abarwayi mu gihe uwazaga kwivuriza muri iki kigo nderabuzima atabonaga aho gucumbikirwa kubera ubuke bw’inyubako. Iki gikorwa cyo gutaha iyi nyubako cyabanjirijwe no kwitabira inteko  y'abaturage yabereye mu murenge wa Remera, Akagari ka Ndekwe; Inteko yitabiriwe na Guverineri w'Intara y'Iburasirazuba CG Emmanuel K. GASANA ari kumwe n'abagize inama y'umutekano itaguye mu Ntara y'Iburasirazuba, Umuyobozi w'Akarere ka Ngoma Madam NIYONAGIRA Nathalie, abagize Komite Nyobozi y'Akarere hamwe n’abagize inama y'umutekano itaguye mu Karere ka Ngoma.

Muri iyi nteko abaturage bayitabiriye baganirijwe kuri gahunda za Leta zitandukanye zigamije kubafasha mu iterambere zirimo: Kwicungira Umutekano bakora Amarondo; Kurwanya ibiyobyabwenge n'amakimbirane mu miryango; Kwimakaza Umuco w'isuku ku mubiri no mu ngo;Kwitabira kwishyura ubwisungane mu kwivuza mu mwaka 2023/2024.

Mu butumwa yagajeje ku baturage Guverineri w’Intara y’Iburasirazuba CG Emmanuel.K GASANA yabwiye abaturage ko iyi nyubako bayihawe n’umukuru w’Igihugu Nyakubahwa Paul KAGAME abasaba gukomeza gufata neza ibikorwaremezo Leta iba yabagejejho kugirango bibafashe kwiteza imbere, abaturage nabo babwiye Guverineri ko bashimira cyane umukuru w’igihugu wabatekereje akabaha ikigo nderabuzima cyujuje byose bityo bakaba baruhutse ingendo bakoraga bajya kwivuriza kure.  

Guverineri yasoje asaba abaturage kwirinda amakimbirane yo mu ngo kuko adindiza iterambere ry’umuryango abasaba gukora ibikorwa bibateza imbere bakirinda gukora ikintu cyose gishobora guhungabyana umudendezo w’abaturage.

 Mu gusoza izi nteko abaturage bigishijwe muri gahunda y’abakuze  bagera kuri 168 bahawe icyemezo kigaragaza ko bigishijwe gusoma,kwandika no kubara muri uyu mwaka w’imigiho 2022/2023.