Mu murenge wa Zaza na Mutenderi huzuye ibikorwa remezo bifasha abaturage kuhira ku buso bwa ha 20. Ni ibikorwa remezo bifite agaciro kangana na miliyoni 271Frw, abahinzi baravuga ko iri koranabuhanga ry’ingufu zikomoka ku mirasire y’izuba barimo gukoresha ryabafashije kugabanya ikiguzi bashoraga mu buhinzi bwabo bwiganjemo imboga.

Abahinzi bo mu murenge wa Zaza ku kiyaga cya Mugesera batangiye kubona umusaruro Puwavulo (Poivron)

Abahinzi bo muri iyi mirenge bavuga ko bishimiye ko muri iyi mpenshi batangiye kubyaza umusaruro ibi bikorwa remezo begerejwe muri uyu mwaka bibafasha kuhira ku buso buto bw’imusozi ndetse no mu nkengero z’ikiyaga cya Mugesera. Ibi bikorwa remezo bizamura amazi hifashishijwe ikoranabuhanga z’ingufu zikomoka ku mirasire y’izuba. Abakoresha ibi bikorwa remezo baremeza ko byaje ari igisubizo kubibazo bahuraga nabyo mu gihe cy’izuba rikabije  dore ko banatangiye no kugeza umusaruro w’imboga n’imbuto ku isoko.

Mu murenge wa Zaza amazi yifashishwa mu bikorwa byo kuhira imbuto n'imboka aturuka mu kiyaga cya Mugesera

Umuyobozi w’Akarere ka Ngoma wungirije ushinzwe iterambere ry’ubukungu, Bwana MAPAMBANO N. Cyrique avuga ko uyu mushinga uziye igihe kuko ugiye gufasha abaturage guhinga ibihembwe byose by’ihinga uko ari bitatu batagengeye ku mihindagurire y’ibihe ahi bajyaga bagorwa mu gihe cy’impeshyi kuko imboga n’imbuto zitabasha kwihanganira izuba zangirikaga cyane ndetse bigatwara abahinzi amafaranga menshi mubikorwa cyo kuhira hakoreshejwe moteri na mazutu byose byabatwaraga amafaranga menshi bityo ayo batakazaga bakayazigama nk’inyungu.

Bwana MAPAMBANO N. Cyriaque umuyobozi w'Akarere ka Ngoma wungirije ushinzwe iterambere ry'ubukungu atangiza kumugaragaro  ibikorwa byo kuhira.

Uyu mushinga washyizwe mu bikorwa ku bufatanye bw’inzego zinyuranye harimo Akarere kaNgoma n’umuryango RWARRI wita ku iterambe ry’icyaro ukaba waratewe inkunga n’ikigega cya Leta gifasha imishinga ibungabunga ibidukikije  cyitwa FONERWA.

Ingufu zikomoka ku mirasire y'izuba nizo zibafishwa mu gukwirakwiza amazi mu mirima igihe cyo kuhira imyaka

Uyu mushinga wo kuhira hifashishijwe imirasire y’izuba uje usanga indi mishinga yo kuhira ku buso buto nayo ikoresha imirasire y’izuba muri aka karere ka Ngoma iri mu murenge wa Rukumberi n’umurenge wa Rukira.