Kuri uyu wa gatanu, tariki ya 02 Kanama 2019, mu Karere ka Ngoma, kimwe n'ahandi hose mu Gihugu, hizihijwe umunsi mukuru w'umuganura. Mu Murenge wa Murama, Akagali ka Sakara mu Mudugudu wa Kabahushi niho habereye ibirori byo kwizihiza uyu munsi ku rwego rw'akarere. Abaturage bakaba abaritabiriye uyu munsi ari benshi ariko by'umwihariko bakaba abri bazanye n'abana babo kwizihiza uyu munsi.

Ibi birori byitabiriwe n’Umunyamabanga Nshingwabikorwa w’Intara y’Iburasirazuba Bwana HABINAMA Kizito ari nawe wari umushyitsi mukuru, Umuyobozi w’Akarere ka Ngoma Bwana NAMBAJE Aphrodise, Umuyobozi w’akarere wungirije Ushinzwe ubukungu Bwana RWIRIRZA Jean Marie Vianney, bamwe mubagize Inama Njyanama y’akarere n’abahagarariye inzego z’umutekano (Ingabo na DASSO).

Umunyamabanga Nshingwabikorwa w'Umurenge wa Murama, BUHIGA Josué yahaye ikaze abashyitsi n'abaturage bitabiriye ibirori by'umuganura, anashimira abaturage be ko bamufasha kwesa imihigo. 

Hamuritswe umusaruro w’ibikomoka ku buhinzi n’ubworozi bikorerwa muri uyu murenge, bimurikirwa Umuyobozi w'Akarere ka Ngoma Bwana NAMBAJE Aphrodise ari kumwe n’Umunyamabanga Nshingwabikorwa w’Intara y’Iburasirazuba Bwana HABIMANA Kizito, nyuma yo kumurikirwa uwo musaruro baha umugisha zimwe mu mbuto zamuritswe. Bafatanyije kandi aba bayobozi bombi baganuje abana bari muri ibi birori babagaburira indyo ya Kinyarwanda banabaha amata naho abakuru bashikirizwa intango y’amarwa.

Umuyobozi w'Akarere ka Ngoma Bwana NAMBAJE Aphrodise mu ijambo rye yagarutse ku mateka y'umuganura, asaba ababyeyi kuwutoza abana babo. Yavuzeko ubukoroni bwa wukuyeho ariko nyuma yo kubona ubwigenge wasubijweho kuri ubu rero ukaba wizihizwa kandi atari umuhango gusa. Yongeraho ko kubahiriza indangagaciro n'umuco nyarwanda ari ingenzi kuri buri munyarwanda. Yavuzeko kandi ibyo kwishimira ari byinshi haba mu miyoborere myiza, ubukungu n'imibereho myiza, asaba abaturage ba Murama kuba abarinzi b'ibyagezweho.

Bwana NAMBAJE Aphrodise, yasabye abaturage gusabana n'imiryango yabo kuri uyu munsi w’Umuganura kuko bagize umugisha, bakagira ibihe giza by'ihinga, abibutsa ko gusagurira isoko bitagikwiye kuba umuhigo ahubwo hakwiye kwimakaza guhingira isoko n’ibijya mu mahanga bikiyongera. 

Umushyitsi mukuru muri ibi birori, Bwana HABIMANA Kizito Umunyamabanga Nshingwabikorwa w'Intara Y’Iburasirazuba, nawe yashimiye abaturage ba Murama n’Akarere ka Ngoma muri rusange ibyiza bamaze kugeraho. Agaruka ku munsi wabahurije hamwe, yavuzeko umuganura ari ibirori byo kwishimira ibyagezweho ariko bigakomerezaho no gufasha abataragize icyo bageraho mu kweza cyangwa kubona umusaruro, bityo bagasangira no kwita ku burere bw’abana bushingiye ku muco, yanavuzeko kandi koumunsi nk'uyu ukwiye kuba uwo kwisuzuma mu buryo bwose.

UMUTONIWASE Clarisse
Stagiaire