Kuri uyu wa kabiri tariki ya 12/01/2016, mu Karere ka Ngoma habaye inama nyunguranabitekerezo ku mirire n’isuku. Iyi nama ikaba igamije gufata ingamba zo gukomeza urugamba rwo kurwanya imirire mibi no kunoza isuku mu Karere ka NGOMA.  

Ibiganiro by’iyi nama yateguwe n’Akarere ku bufatanye n’umushinga Integreted Nutrition and WASH Activity(INWA) wo  muri CRS( CATHOLIC RELIEF SERVICES),  byatangijwe ku mugaragaro n’umuyobozi w’Akarere wungirije ushinzwe imibereho myiza, Madame KIRENGA Providence. Inama ikaba yahuje abafatanyabikorwa banyuranye bafite gahunda zo kurwanya imirire mibi no guteza imbere isuku mu Karere.  Mu gufungura inama, Madame KIRENGA Providence yashimiye abakozi b’umushinga INWA, bayobowe na Dr. Yvonne UMURUNGI, kuba baje gutera ingabo mu bitugu gahunda z’Akarere zinyuranye zo kurwanya imirire mibi, izo gahunda zisanzwe zikubiye muri DPEM(District Plan to Eliminate Malnutrition).  Yibukije abari muri iyi nama nyunguranabitekerezo ko ibikorwa bigomba kunozwa hazirikanwa Vision 2050.

Dr. Yvonne UMURUNGI yagaragaje gahunda ya INWA, nk’umushinga wa CRS ukorera mu Gihugu hose mu Turere umunani: Kayonza,  Rwamagana na Ngoma mu Burasirazuba, Nyanza na Ruhango mu Majyepfo, Nyabihu mu Burengerazuba na Nyarugenge na Kicukiro mu Mujyi wa Kigali. Ikigamijwe mu myaka itanu uyu mushinga INWA uzamara akaba ari uguteza imbere imirire myiza y’igitsina gore kiri mu kigero cyo kubyara n’abana bari munsi y’imyaka itanu.