Kuri uyu wa Gatatu taliki 05/10/2022, mu rwego rwo kurwanya inzara no guteza imbere ubukungu n'imibereho myiza y'abaturage uyu munsi Umuuyobozi w'Akarere wungirije ushinzwe iterambere ry'ubukungu Bwana MAPAMBANO NYIRIDANDI Cyriaque yifatanyije n'ubuyobozi bwa AEBER mu gikorwa cyo gutanga ibiti by'imbuto y'imyumbati, inanasi, avoka, amacunja, insina n'ihene 400 ku bahinzi 320 bo mu murenge wa Zaza binyuze mu mushinga Edeni Yacu.

Umuyobozi w'Akarere wungirije ushinzwe iterambere ry'ubukungu Bwana MAPAMBANO NYIRIDANDI Cyriaque ashyikiriza umuturage imbuto y'ibiti biribwa byo gutera.

Uyu mushinga ugamije gufasha abahinzi nkuko bigaragara mu kwizamura mu mibereho myiza aho bigishwa bakanafashwa gukora ubuhinzi butangiza ibidukikije.

Bamwe mu baturage twaganiriye bavuze ko uyu mushinga ujye ari igisubizo ku buhinzi bwabo dore ko ubusanzwe nubwo babonaga imbuto bagahinga ariko wasangaga bahura n’imbogamizi zo kutamenya uburyo bugezweho bushobora gukora ubuhinzi butangiza ubutaka ndetse butanag n’umusaruro.

Uwitwa NYIRABUCUMU Epiphanie utuye mu murenge wa Zaza,Akagali ka Ruhembe, yasobanuye ko uyu mushinga ujye kubahindurira imibereho mu buryo bw’iterambere ati: “Nka mbere twabanje gukora igerageza ubu dutangiye gusarura none turabona twarongereye umusaruro ni byiza rero kuko izi mbuto baziduhera Ubuntu ndetse bakanatwigisha uburyo bwiza bwo guhinga hagamijwe kongera umusaruro”

Naho mugenzi witwa KAGINA Leopord nawe atuye muri uyu murenge wa Zaza we yagarutse k’ubumenyi bahawe n’uyu mushinga kubijyanye no guhinga ubungabunga ubutaka yagize ati: “Twishimiye kuba tubonye umufatanyabikorwa ugiye kudufasha kongera umusaruro ndetse nubwiza mu buhinzi twari dusanzwe dukora ariko tukagira imbogamizi z’ubumenyi buke, imbuto zidahagije ndetse zitizewe rimwe na rimwe twamaraga kuzitera zikanga no kumera ariko iyi mbuto yimyumbati duhawe difite icyizere ko izatanga umusaruro yaba mu bwinshi ndetse no mu bwiza”.  

Umuvugizi mukuru wa AEBR mu Rwanda Bishop Emmanuel NDAGIJIMANA yavuze ko uyu mushinga ugamije guhindura ubuzima bwa buri wese bahindura ubuhinzi kinyamwuga muri gahunda y’ubuhinzi bubungabunga ubutaka aho uhinga ku buso buto ugasarura bwinshi yagize ati: “Uyu mushinga Edeni Yacu ugamije gufasha abaturage wkihaza mu biribwa no kwikura mu bukene aha twabazaniye imbuto y’imyumbati, inanasi, avoka, imyembe, insina z’injagi, amaronji ndetse n’ihene zigera kuri 400”

Mu butumwa yagarutseho umuyobozi w'Akarere wungirije ushinzwe iterambere ry’ubukungu Bwana MAPAMBANO NYIRIDANDI Cyriaque yashimiye uyu mushinga avuga ko uzanye impinduka zigamije guteza imbere abaturage ndetse no kubafasha kwivana mu bukene. Yakomeje asaba abagenerwabikorwa b'umushinga kubyaza amahirwe uyu mushinga bakajya babona aho bakura ubwishyu bwa Mituweli bitabagoye dore ko bahawe ibyihanze bibafasha kwiteza imbere binyuze mu buhinzi n'ubworozi.

Yanasabye abaturage bose kugira uturima tw’igikoni duhinzeho imboga, gukora imirwanyasuri ifata amazi no gukomeza kwitabira gahunda yo gukora amaterasi y’indinganire ahahanamye.

Zimwe mu mbuto z'inanasi zatanzwe mu cyiciro cya mbere zitezweho gutanga umusaruro ushimishije

Abaturage bahawe imbuto y'insina zo mu bwoko bw'injagi zitezweho gutanga umusaruro

Hatanzwe ibiti by'imbuto ziribwa bitandukanye harimo; Imyembe, amaronji, avoka,indimu....