Muri gahunda ya “Shyashyanira umuturage” igamije kwegera abaturage mu mirenge, kubatega amatwi no gukemura ibibazo kuri uyu wa Gatatu taliki 09.11.2022, Umuyobozi w'Akarere ka Ngoma Madamu NIYONAGIRA Nathalie ari kumwe n’abagize Komite Nyobozi y’Akarere, abagize inzego z’umutekano bifatanyije n'ubuyobozi bw'umurenge wa Rurenge mugukemura ibibazo by'Abaturage.

Ibibazo byakiriwe byiganjemo ibishingiye ku makimbirane yo mu miryango; ibijyanye n'irangamimerere n’ibishingiye ku butaka.

Abaturage bashimiye ubuyobozi bw'Akarere ka Ngoma kubwo kubegera bakabaruhura ingendo bakoraga basanga abayobozi ku biro bishimira ko byabafashije kuzigama amafaranga y'urugendo bashoboraga gutakaza bajya kubaza ibibazo byabo ku karere ndetse no ku murenge.

Umuyobozi w'Akarere Madamu NIYONAGIRA Nathalie yasabye abaturage kwirinda amakimbirane kuko adindiza iterambere ry'umuryango ahubwo bagakemura ibibazo byabo mu bwumvikane yasoje asaba abayobozi ku murenge no ku kagali kurushaho kwegera abaturage bakumva ibibazo byabo bakabikemura hakiri kare ndetse bigakorerwa mu ruhame kuko iyo bitinze bituma abaturage bahora mu manza bikabatesha imirimo yakabaye ibateza imbere.  Yasoje yihanangiriza abayobozi bafata ibigenewe abaturage bakabigira ibyabo avuga ko batazihanganirwa kuko ari ukudindiza iterambere ry'umuturage.