Kuri uyu wa gatandatu, tariki ya 13/4/201, mu Karere ka Ngoma, kimwe n'ahandi hose mu Gihugu, habaye igikorwa cyo gusoza icyumweru cy’icyunamo cyo kwibuka ku nshuro ya 25 Jenoside yakorewe abatutsi 1994. Uyu muhango ku rwego rw’Akarere wabereye mu Murenge wa Zaza.

Uyu muhango wo gusoza icyumweru cy’icyunamo cyo Kwibuka ku nshuro ya 25, mu Karere ka Ngoma, witabiriwe na Minisitiri KAYIRANGWA RWANYINDO Fanfan, usanzwe ari imboni y’Akarere ka Ngoma, muri Guverinoma n'Abadepite MUKANDERA Iphygénie na NDAGIJIMANA Léonard, Abahagarariye IBUKA, CNLG n’Umuryango w’Abarokotse Jenoside i Zaza witwa TUZA(Turiho Zaza, Ntukazime), Abayobozi b’inzego z’umutekano zigize Inama y’Umutekano itaguye y’Akarere, Abajyanama b’Akarere, Abakozi b’Akarere  ndetse n’abaturage b’i Zaza.
Uyu muhango wo gusoza icyumweru cy’icyunamo cyo kwibuka Jenoside, ukaba wabimburiwe n’urugendo rwo kwibuka rugana ku rwibutso rwa Zaza ruruhukiyemo imibiri y’abazize Jenoside 12025, no gushyira indabo ku mva.
Yaba uwatanze ubuhamya Soeur BENEGUSENGA Marie Anastasie, yaba Perezida wa TUZA(Turiho Zaza, Ntukazime), Bwana NZARAMBA Déo, bose bagarutse ku kibazo cy’imibiri y’abazize Jenoside itaraboneka, bityo basaba abantu kugira ubutwari bakavuga aho imirambo yajugunywe kugira ngo, bashyingurwe mu cyubahiro, kuko bituma intimba y’imitima y’abarokotse yoroha.
Umuyobozi w’Akarere, Bwana NAMBAJE Aphrodise yihanganishije abarokotse Jenoside, arabakomeza. Yamaganye abicanyi ruharwa nka Depite JYAMUBANDI Ildephonse, BUCYANA Martin na GAKWARE Léopold bayogoje Zaza, bakarimbura Abatutsi. Meya  yasabye abaturage, kurwanya ingengabitekerezo ya jenoside no gupfobya Jenoside. Yibukije ko Kwibuka ari umwanya wo kunamira abazize Jenoside, gufata mu mugongo abarokotse no kuzirikana ubutwari, ubupfura n'ubwitange by'Ingabo zari iza FPR zahagaritse Jenoside ziyobowe na Nyakubahwa Perezida wa Repubulika Paul KAGAME.

Mu ijambo rye, Minisitiri KAYIRANGWA RWANYINDO Fanfan, wari n’umushyitsi mukuru, yakomeje abarokotse, arabahumuriza, ababwira ko Leta nziza kandi ibazirikana, ikabitaho, ihari. Yavuze ko Kwibuka ari uburyo bwo kurwanya urupfu abishwe bapfuye, ni ugukomeza umurage w'abazize Jenoside. Mu kwibuka, tuba twanga ko urupfu ruduherana kuko twabonye urumuri rw'icyizere nyuma ya Jenoside. Yakomeje agira ati "Kwibuka ni uguharanira ko Jenoside itazongera ukundi, ni uguha agaciro abarokotse Jenoside". Yagaragaje ko muri iyi myaka 25 Leta yatanze ihumure mu Banyarwanda. Yibukije amagambo ya Nyakubahwa Perezida wa Repubulika Paul KAGAME agira ati "Ibyabaye, ntitwashoboye kubikumira, ntitwabisubiza nyuma, ariko twakwiyemeza ko ibyabaye, bitazongera ukundi".
Mu gusoza ijambo rye, Minisitiri KAYIRWANGWA RWANYINDO Fanfan, yashimangiyeko Leta yiyemeje kurwanya ipfobya n'ihakana rya Jenoside, ingengabitekerezo ya jenoside n'amacakubiri. Yasabye urubyiruko kumenya amateka ya Jenoside, rukaba inkingi yo kubaka u Rwanda rushya, rutazongera kubamo jenoside. Yibukije abaturage ko kwibuka bitarangirana n’iki cyumweru ahubwo ko bikomeza mu minsi 100.

By SIBOMANA Jean Bosco
PRMCO/Ngoma