Kuri uyu wa gatatu taliki 08.09.2021 Guverineri w'Intara y'Iburasirazuba CG Emmanuel K. GASANA aherekejwe n'abagize inama y'umutekano y'Intara y'Iburasirazuba yitabiriye inama mpuzabikorwa y'Akarere ka Ngoma aho yanatangije ubukanguramabaga bugamije: “Kunoza imikorere n'imikoranire hagati y'abayobozi n'abaturage mu kuzana impinduka nziza n'iterambere”

Mu ijambo ry'ikaze ryatanzwe na Bwana MUGIRANEZA Thierry perezida wa komisiyo y'imiyoborere myiza y'inama Njyanama y'Akarere ka Ngoma wari uhagarariye Perezida w'inama njyanama y'Akarere yagaragaje ko intego y'inama mpuzabikorwa ari kongera kwisuzuma nk'abayobozi, ukwimakaza uruhare rw'umuturage hamwe n'umuyobozi mu miyoborere myiza.

Muri iyi nama Bwana NAMBAJE Aphrodise umuyobozi w'Akarere ka Ngoma yagaragaje ishusho rusange y'ibikorwa by' iterambere Akarere ka Ngoma kagezeho haba mu bukungu, Imibereho myiza, Imiyoborere n'ubutabera ndetse n'ibikorwa biteganyijwe gukorwa uyu mwaka w'ingengo y'imari wa 2021/2022.

Bwana NAMBAJE Aphrodise umuyobozi w'Akarere ka Ngoma yagaragarije abitabiriye inama uko Akarere kesheje imihigo 202/2021

Mu butumwa bwatanzwe n'abagize inama y'umutekano y'Intara bwose bwibanze ku gukangurira abitabiriye inama kugira ubufatanye hagati y'abayobozi n'abaturage mu kubungabunga umutekano cyane cyane gukora amarondo,kunoza ikayi y'abinjira mu mudugudu no kurwanya ibyaha bitandukanye binyuze mu bukangurambaga bw'umudugudu utarangwamo icyaha.

Inama yitabiriwe n'abayobozi batandukanye  barimo na Madamu Kirenga Providence Visi Meya ushinzwe imibereho myiza

Inama yitabiriwe n'abayobozi batandukanye  barimo na Bwana MAPAMBNO NYIRIDANDI Visi Meya ushinzwe iterambere ry'ubukungu

Mu byiciro byitabiriye inama mpuzabikorwa y'Akarere ka Ngoma harimo n'abakuru b'imidugudu

Mu butumwa Guverineri CG Emmanuel K.GASANA yagejeje ku bitabiriye inama mpuzabikorwa yasabye abayobozi kongera imbaraga mu  gukangurira abaturage kwitabira gutanga imisanzu y'Ubwisungane mu Kwivuza ku gihe, EjoHeza n'izindi gahunda za Leta hagamijwe kugira umuturage utekanye,ufite amahirwe angana n'aya mugenzi we, uteye imbere kandi ufite imibereho myiza.

Muri iyi nama Guverineri w’Intara y’Iburasirazuba CG Emmanuel K.GASANA ari kumwe n'abagize inama y'umutekano y'Intara bemereye "Inka y'Ubumanzi" Madamu NYIRAMANA Floride Umukuru w'umudugudu wa Nyakagezi, Akagari ka Gafunzo mu Murenge wa Sake mu rwego rwo kumushimira ibikorwa by'indashyikirwa akora afatanyije n'abaturage ayobora aho yahize indi midugudu mu kwesa umuhigo wa mituweli aho buri rugo rwamaze kwishyura ubwisungane mu kwivuza 100%.

Madamu NYIRAMANA Floride umukuru w'umudugudu wa Nyakagezi, Akagali ka Gafunzo wahawe inka y'ubumanzi

Iyi nama yitabiriwe n'abagize inama y'umutekano y'intara, Inama Njyanama y'Akarere ka Ngoma, Abagize inama y'umutekano y'Akarere ka Ngoma, Abanyamabanga Nshingwabikorwa b'imirenge n'utugali, abakuru b'imidugudu ndetse n’abafatanyabikorwa batandukanye.

BAKENGANA Janvier

PRMCO/Ngoma District