Kuri uyu wa Gatanu taliki 15 Ugushyingo 2024 Umuyobozi w’Akarere Umuyobozi w’Akarere Madamu NIYONAGIRA Nathalie ari kumwe n’abagize inama y’umutekano itaguye y’Akarere ka Ngoma yakiriye Madamu Sulaya HAKUZIYAREMYE Guverineri wungirije wa Banki Nkuru y’u Rwanda n'itsinda yari ayoboye baje mu Karere gutangiza ubukangurambaga bwo gushishikariza abagore kwishyurana hakoreshejwe telefoni ngendanwa hagamijwe kwiteza imbere mu by'imari.

Iki gikorwa cyitabiriwe n’abagore barenga 200 bahagarariye abanda kuva ku kagali kugera ku Karere, Banki Nkuru y’u Rwanda yatangije kubufatanye na Minisiteri y’Ubutegetsi bw’Igihugu na Minisiteri y’Ikoranabuhanga kigamije gukangurira abagore gukoresha ikoranabuhanga rya terefoni muri serivisi z’imari hagamijwe kwiteza imbere no kwihaza mu by’imari mu Karere ka Ngoma. Guverineri wungirije wa Banki Nkuru Y’u Rwanda Madamu Sulaya HAKUZIYAREMYE yatangiye ashimira ubuyobozi bwiza bw’igihugu ku bw’uruhare rwabwo rukomeye mu gukangurira abagore gukoresha ikoranabuhanga rya terefoni muri serivisi z’imari. Mu butumwa yatanze Guverineri wungirije wa Banki Nkuru y'u Rwanda Madamu Sulaya HAKUZIYAREMYE yagize ati: "Uteje imbere mutima w’urugo aba ateje imbere umuryango ndetse n’igihugu muri rusange turasaba buri wese gukomeza kwiteza imbere no guharanira ko abanyarwanda bagira amahirwe angana mu gukoresha serivisi z’imari". Yasoje ashimira ubuyobozi bw’Akarere ka Ngoma anashishikariza buri wese gukomeza imihigo mu kwiteza imbere no guharanira ko by’umwihariko nta Munyarwanda usigara inyuma mu gukoresha serivisi z’imari.