Kuri uyu wa Gatanu taliki 13 Ukuboza 2024, mu Karere ka Ngoma kimwe n’ahandi hose mu gihugu hizihijwe umunsi mpuzamahanga wa mwarimu.  Umuyobozi w’Akarere NIYONAGIRA Nathalie ari kumwe n’Umuyobozi w’Akarere wungirije ushinzwe iterambere ry’ubukungu Bwana MAPAMBANO NYIRIDANDI Cyriaque hamwe n’abagize inzego z’umutekano bifatanyije b’abarimu bo mu Murenge wa Sake kwizihiza uyu munsi ku nsanganyamatsiko igira iti: “Umwarimu uhawe agaciro bimwongerera imbaraga ashyira mu burezi”.

Mu butumwa yagejeje ku barimu, Umuyobozi w’Akarere Madamu NIYONAGIRA Nathalie yashimiye uruhare rwa mwarimu mu iterambere ry’Igihugu, abasaba guhanga udushya tugamije gukundisha abana ishuri mu guteza imbere uburezi.

Umuyobozi w’Akarere ka  Ngoma ,  Madamu NIYONAGIRA Nathalie

Yagize ati: “Uyu munsi ni dukwiye kongera kwisuzuma tukareba niba mu kazi kacu tugakora uko bikwiriye mu rwego rwo kurushaho kurema abazaba abayobozi b’iki gihugu ejo hazaza twirinde ikintu cyose cyatuma abana bacu badindira mu myigire kuko Leta nayo ihora itekereza ikintu cyateza imbere imibereho myiza ya mwarimu.”

Mu Karere ka Ngoma habarurwa ibigo by’amashuri abanza 127 bifite abarimu 3,223. Amashuri ya Tekiniki, Imyuga n’Ubumenyingiro (Rwanda TVET Board) afite abarimu 242.

Ibigo by’indashyikirwa mu gutsindisha neza mu bizamini bya Leta bya 2023-2024 mu Murenge wa Sake byahawe icyemezo cy’ishimwe ry’umurimo w’ubutwari byakoze. Mu gihe n’abarimu bafite amasomo bigisha abana batsinze neza nabo bashimiwe.

Ibigo by'Amashuli   byabaye  indashyikirwa  byahawe  icyemezo cy’ishimwe ry’umurimo w’ubutwari 

Umuyobozi w’Akarere ka Ngoma, NIYONAGIRA Nathalie akaba yasoje yifurije abarimu umunsi mwiza, gukomeza kurangwa n’umurimo unoze no guhanga udushya.