Kimwe n’ahandi mu gihugu kuri uyu wa 1 Gashyantare 2023 mu karere ka Ngoma hizihijwe umunsi mukuru w’intwari z’u Rwanda urubyiruko rusabwa kwigira ku mateka yabakoze ibikorwa by’ubutwari kugirango nabo babashe kugera ikirenge mu cyabo. Ku rwego rw’Akarere uyu munsi wizihirijwe mu murenge wa Kibungo,Akagali ka Cyasemakamba ibirori byabereye kuri Stade y’Akarere ka Ngoma byitabirwa n’abashyitsi batandukanye barimo intumwa za Rubanda, Abagize Inama Njyanama y’Akarere ka Ngoma, Abagize inzego z’umutekano zikorera mu karere hamwe n’Abafatanyabikorwa b’Akarere ka Ngoma.

Urugendo rwabanjirije ibirori byo kwizihiza umunsi mukuru w'intwari z'u Rwanda rwahereye ku biro by'Akarere ka Ngoma rwerekeza kuri Stade Ngoma

Mu butumwa bwagarutsweho n’abayobozi batandukanye bari bitabiriye ibirori byo kwizihiza umunsi mukuru w’intari z’u Rwanda bwibanze ku gushishikariza urubyiruko kugira umuco wo kwanga ikibi bagaharanira gukora ibikorwa by’ubutwari.

Umuyobozi w’Akarere Madamu NIYONAGIRA Nathalie mu butumwa yagejeje ku bitabiriye ibirori byo kwizihiza umunsi mukuru w’intwari z’u Rwanda yabanje kubasobanurira icyo intwari aricyo ati: ‘‘Intwari ni umuntu ukurikirana icyo yiyemeje kugeraho kikavamo igikorwa cy’ikirenga gifitiye abandi akamaro. Abikorana ubupfura n’ubwitange bihebuje, kandi akirinda ubugwari mu migirire ye, ntagamburuzwe n’amananiza’’. Aha niho yahereye yibutsa urubyiruko kurangwa n’umuco wo kwiyemeza no kugira intego nkuko urubyiruko rwabohoye u Rwanda rwari rufite intego n’umutima ukomeye wo bakemera kurwanira ukuri ngo babohore igihugu cyacu.

Umuyobozi w'Akarere Madamu NIYONAGIRA Nathalie ubwo yagezaga ubutumwa ku bitabiriye ibirori byo kwizihiza umunsi mukuru w'intwari z'u Rwanda.

Umushyitsi mukuru muri ibi birori Hon.NYIRAHIRWA Veneranda nawe yagarutse ku butwari bwaranze abakurambere bacu ndeste yibanda cyane kubwaranze urubyiruko rw’inkotanyi mu rugamba rwo kubohora u Rwanda aha niho yahereye asaba abakiri bato kwigira ku mateka yabakoze ibikorwa by'ubutwari kuko abenshi bari urubyiruko abasaba kwirinda ingeso mbi zirimo ibiyobyabwenge kuko ubikoresha ntacyo yabasha kwigezaho.

Hon.Depite NYIRAHIRWA Veneranda yasabye urubyiruko kugira umuco w'ubutwari mubyo bakora byose bakanga ikibi.

Amafoto yaranze ibirori byo kwizihiza umunsi mukuru w'intwari mu karere ka Ngoma

Ibirori byo kwizihiza umunsi mukuru w’intwari z’u Rwanda byasojwe no gukina umukino wa nyuma w’amarushanwa Umurenge Kagame Cup mu cyiciro cy’umupira w’amaguru mu bakobwa n’abahungu.

Hon.Depite NYIRAHIRWA veneranda atangiza umukino wa nyuma wahuje ikipe y'abakobwa b'umurenge wa Rukira na Rukumberi.

Hatanzwe ibihembo bitandukanye biherekejwe n'ibikombe ku makipe yahize ayandi mu marushanwa Umurenge Kagame cup

Mu bakobwa ikipe y’umurenge wa Rukumberi niyo yegukanye igikombe itsinze umurenge wa Rukira ibitego 6-1.

Mu bahungu ikipe y’umurenge wa Mugesera niyo yegukanye igikombe nyuma yo kunganya n’umurenge wa Rukira 1-1; Hitabajwe za Penalite maze Mugesera itsinda Rukira penalite 4-3.

Kapiteni w'ikipe y'abakobwa ya Rukumberi ashyikirizwa igikombe na Lt. Col Gaetan NZABONIMPA umuyobozi w'ingabo mu turere twa Ngoma, Kayonza, Kirehe na Bugesera.

Umurenge wa Rukumberi wegukanye igikombe Umurenge Kagame Cup 2022/2023 mu mupira w'amaguru.

Umurenge wa Mugesera wegukanye igikombe Umurenge Kagame Cup 2022/2023 mu bahungu.