Uyu munsi taliki 08/04/2022 mu karere ka Ngoma ibikorwa byo #Kwibuka28 Jenoside yakorewe Abatutsi mu 1994 byakomereje mu murenge wa Sake hibukwa abatutsi bajugunywe mu kiyaga cya Mugesera.

Igikorwa cyabanjirijwe no gushyira indabo ku rwibutso rwa Rukoma mu rwego rwo kunamira abatutsi bishwe muri jenoside yakorewe abatutsi mu 1994 baruhukiye muri urwo rwibutso nyuma igikorwa cyakomereje ku kiyaga cya Mugesera hashyirwa indabo mu mazi nk'ikimenyetso cyo kwibuka no kunamira abatutsi baguye mu biyaga n'inzuzi mu gihe cya Jenoside yakorewe Abatutsi mu 1994.

Umushyitsi mukuru yari Senateri Hon NKUSI Juvenal wari kumwe na Senateri MUPENZI George bakiriwe n'umuyobozi wakarere ka Ngoma Madamu NIYONAGIRA Nathalie wari kumwe Bwana MAPAMBANO N.Cyriaque V/M ubukungu na Madamu MUKAYIRANGA M. Gloriose V/M imibereho myiza hamwe n'abagize inama y'umutekano itaguye y'Akarere ka Ngoma, ubuyobozi bw'umurenge wa Sake ndetse n'abaturage.

Mu ijambo rye umuyobozi w'Akarere Madamu NIYONAGIRA Nathalie yasabye abitabiriye #Kwibuka28 Jenoside yakorewe abatutsi mu 1994 mu murenge wa Sake kugira ubufatanye mu gukomeza kubaka igihugu birinda amacakubiri kugirango Jenoside itazongera ukundi, abasaba gukomeza kwibuka bafata mu mugongo abacitse ku icumu.

Mu buhamya bw’uwarokokeye mu yahoze ari komini Sake Bwana Egide NDARUHUTSE yagarutse ku nzira y’umusaraba banyuzemo kuri kiliziya ya Sake mu gihe cya Jenoside yakorewe Abatutsi mu 1994 kuko abari bahahungiye bari bahizeye ubuhungiro yagaragaje ko abagerageje guhunga abicanyi baguye mu kiyaga cya Mugesera.

Bwana NDARUHUTSE Egide yarakokeye Jenoside yakorewe abatutsi mu 1994 mu yahoze ari komini Sake.

Hon.Senateri MUPENZI George yashimye Leta y'u Rwanda yahisemo kugira imiyoborere ibanisha neza abanyarwanda asaba ko muri iki gihe twibuka ku nshuro ya 28 Jenoside yakorewe Abatutsi mu 1994 uwaba azi amakuru yaho imibiri y'abatutsi bishwe muri Jenoside yakorewe abatutsi mu 1994 bajugunywe yayatanga bagashyingurwa mu cyubahiro.

Urwibutso rwa Jenoside rwa Rukoma-Sake rushyinguyemo imibiri y'Abatutsi basaga 760

Hon. Senateri MUPENZI George yifatanyije n'abaturage bo mu murenge wa Sake #Kwibuka28 abatutsi bajugunywe mu kiyaga cya Mugesera mu gihe cya Jenoside yakorewe Abatutsi muri Mata 1994.

Abahagarariye inzego z'umutekano mu karere ka Ngoma bifatanyije n'abaturage bo mu  murenge wa Sake #Kwibuka28 abatutsi bajugunywe mu kiyaga cya Mugesera mu gihe cya Jenoside yakorewe abatutsi muri Mata 1994.

Mu murenge wa Sake bibutse abatutsi bishwe muri Jenoside yakorewe Abatutsi mu 1994 bakajugunywa mu kiyaga cya Mugesera.

Urwibutso rwa Rukoma rushyinguyemo imibiri y'Abatutsi bishwe muri jenoside yakorewe Abatutsi muri Mata 1994 basaga 760.