Ibitaro Bikuru bya Kibungo byibutse abari abakozi, abarwayi n’abarwaza bazize Jenoside yakorewe Abatutsi mu 1994. Ni igikorwa cyitabiriwe n’abayobozi mu nzego zitandukanye, barimo Umuyobozi w’Akarere wungirije ushinzwe imibereho myiza MUKAYIRANGA Marie Gloriose, abagize inzego z’umutekano, abakozi b’Ibitaro n’abaturage.

Iki gikorwa cyabanjirijwe n’urugendo rwo kwibuka rwahereye ku Bitaro rwerekeza ku Rwibutso rwa Jenoside rwa Kibungo, aho bunamiye banashyira indabo ku mva iruhukiyemo imibiri isaga 25,000 y’inzirakarengane zazize Jenoside yakorewe Abatutsi mu 1994.

Mu butumwa bwe, Dr. Munyemana Jean Claude, Umuyobozi w’Ibitaro Bikuru bya Kibungo, yavuze ko kwibuka ari umwanya wo guha icyubahiro abazize Jenoside no kongera gushimangira inshingano zo kurwanya ivangura iryo ari ryo ryose. Yagize ati: “Kwibuka ni umwanya wo kwigira ku mateka mabi yaranze igihugu cyacu, tukiyemeza ko ibyabaye bitazongera ukundi. Tugomba gukomeza guharanira ubumwe n’ubwiyunge dushyira imbere indangagaciro z’ubumuntu no kurwanya ingengabitekerezo ya Jenoside mu nshingano zacu za buri munsi dufite zijyanye no kuvura abaza batugana kuko Leta yashyizeho gahunga y’ubuvuzi budaheza uwari we wese.”

Ndongozi Eugène, umwe mu barokotse Jenoside yakorewe Abatutsi mu 1994, wageze ku bitaro bya Kibungo ari muri gahunda yo kwivuza ubwo Jenoside yatangiraga dore ko yahageze yakomeretse bikomeye, yasangije abitabiriye igikorwa cyo Kwibuka ubuhamya bw’ibyo yanyuzemo. Yavuze ko kuba yararokotse ari igitangaza kuko interahamwe zazaga mu Bitaro zigatwara abatutsi zikajya kubicira mu rwobo rwa hafi y'Ibitaro, ariko anashimira Leta y’u Rwanda n’abaganga bamufashije gukira ibikomere. Yagize ati: “Kuba mpari ni umugisha ukomeye. Turashimira Leta yacu yashyize imbere ukuri, ubutabera n’isanamitima. Turasaba ko amateka yacu yigishwa urubyiruko rukamenya aho igihugu cyavuye, turashimira Inkotanyi zo kabyara zaturokoye zikongera kudusibiza ubuzima mu gihe twabonaga ko ibyacu byarangiye.”

Biseruka Omar, Perezida wa IBUKA mu Karere ka Ngoma, yashimiye ubuyobozi bw’ibitaro bya Kibungo ku gikorwa cy’indashyikirwa cyo kwibuka abari abakozi n’abarwayi n’abarwaza bazize Jenoside yakorewe abatutsi mu 1994 ndetse no gufasha abarokotse kubona amacumbi meza. Yagize ati: “Ibitaro ni ahantu hagomba kurinda ubuzima bw'abantu, ariko mu 1994 byabaye ahantu habera ubugome ndengakamere abaje abahungira bakicwa n'abakagombye kubavura gusa turashimira bamwe mu baganga bagize umutima wo kwita ku batutsi bazaga bakomeretse nubwo bitari byoroshye”.

Umuyobozi w’Akarere wungirije ushinzwe imibereho myiza, Mukayiranga Marie Gloriose, yashimangiye ko kwibuka ari igihe cyo kongera kwiyemeza gukomeza urugamba rwo kubaka u Rwanda rushya, rushingiye ku bumwe, amahoro n’iterambere ati: “Turi hano kugira ngo twibuke abacu bazize uko bavutse dushyimangira igihango dufitanye nabo, ariko tuniyemeze gukora ibishoboka byose mu kurwanya ivangura, ingengabitekerezo ya Jenoside n’amacakubiri, twese dufite uruhare mu kwigisha abadukomokaho amateka yaranze iki gihugu kugirango ibyabaye bitazongera kubaho ukundi.”

Iki gikorwa cyaranzwe n'ibiganiro, ubuhamya n'indirimbo zo kwibuka byose byagarutse ku gukomeza urugendo rwo komora ibikomere no kubaka ejo hazaza h’igihugu cyacu kizira ingengabitekerezo ya Jenoside ndetse n’amacakubiri kuko Abanyarwanda twahisemo kuba umwe.

Amwe mu mafoto yaranze igikorwa cyo Kwibuka ku nshuro ya 31 Jenoside yakorwe Abatutsi mu 1994

Umuyobozi w'Akarere wungirije ushinzwe imibereho myiza y'abaturage MUKAYIRANGA Marie Gloriose 

Abagize inzego z'umuteakano n'abandi bayobozi mu nzego zitandukanye bari bitabiriye igikorwa cyo #Kwibuka31 abari abakozi b'ibitaro bazize Jenoside yakorewe abatusti mu 1994

Abakozi batandukanye mu Bitaro Bikuru bya Kibungo n'Ibigo Nderabuzima bari bitabiriye igikorwa cyo  kwibuka bagenzi babo bazize jenoside yakorewe abatutsi mu 1994.

Umuyobozi w'Akarere wungirije ushinzwe imibereho myiza y'abaturage MUKAYIRANGA Marie Gloriose yacanye urumuri rw'icyizere.

Abafite ababo bazize Jenoside yakorewe abatutsi bashyize indabo ku rwibutso mu rwego rwo kubunamira.

Umuyobozi w'Akarere wungirije ushinzwe imibereho myiza MUKAYIRANGA Marie Gloriose yunamiye abari abakozi b'Ibitaro n’amavuriro  bazize jenoside yakorewe abatutsi mu 1994

Umuyobozi mukuru w'Ibitaro Bikuru bya Kibungo Dr.MUNYEAMANA Jean Claude nawe yunamiye abari abakozi b'Ibitaro n'amavuriro bazize Jenoside yakorwe abatusti mu 1994.