Kuri uyu wa gatatu taliki 08.03.2023 kimwe n'ahandi mu gihugu hirya no hino mu mirenge 14 igize Akarere ka Ngoma hizihirijwe umunsi mpuzamahanga w'Umugore.

Ku rwego rw'Akarere ka Ngoma uyu munsi wizihirijwe mu murenge wa Kazo witabirwa n'abashyitsi batandukanye barangajwe imbere na Perezida wa Komisiyo y'igihugu y'uburenganzira bwa muntu Madamu MUKASINE Marie Claire ari kumwe na Senateri Hon. NKUSI Juvenal hamwe n'abandi bafatanyabikorwa b'Akarere ka Ngoma.

Mu gutangiza ibirori byo kwizihiza umunsi mpuzamahanga w’umugore mu karere, Umuyobozi w' Akarere ka Ngoma Madame NIYONAGIRA Nathalie wari kumwe n'abandi bayobozi batandukanye barimo umuhuzabikorwa w' inama y' igihugu y' abagore mu karere ka Ngoma hamwe n'abagize inzego z' umutekano mu karere ka Ngoma yashimiye ubuyobozi bwiza bwahaye umugore agaciro kugirango nawe agaragaze uruhare rwe mu iterambere ry'igihugu asoza ashimira afatanyabikorwa batandukanye uruhare bagira mu iterambere ry'abaturage b'Akarere ka Ngoma.

Umushyitsi mukuru Madamu MUKASINE Marie Claire yavuze ko kwizihiza umunsi mpuzamahanga w'umugore uba ari umwanya mwiza wo gusubiza amaso inyuma tukareba ikintu cyose gishobora kwangiza ahazaza h'umwana w'umukobwa tumurinda ihohoterwa kuko iyo ahohotewe umuryango uba wangiritse.

Bimwe mu bikorwa byaranze umunsi mpuzamahanga w'umugore:

Gutaha k' umugaragaro inzu yubakiwe umugore utishoboye k'ubufatanye n' abagore bakorera mu Karere ka Ngoma mu mwaka 2022-2023; Gutangiza icyumweru cyahariwe kwimakaza ihame ry' uburinganire mu Ntara y'Iburasirazuba cyatangiye taliki 07-13.03.2023

Insanganyamatsiko igira iti: "ihame ry' uburinganire, inkingi y' imiyoborere myiza n' iterambere ridaheza kandi rirambye"; Gusezeranya imiryango 24 yabanaga itarasezeranye; Kuremera abagore batishoboye (Ibitenge, Ibiseke, ihene n' inka) no guha ibikoresho by' ishuri abana baturuka mu miryango itishoboye; Ku gicamunsi habaye umukino w'umupira w'amaguru wahuje abagore bakorera ku karere ka Ngoma na PSF umukino warangiye banganyije 1-1.

Uyu munsi wizihijwe ku nsanganyamatsiko igira iti: "Ntawe uhejwe mu guhanga udushya n' ikoranabuhanga biteza imbere uburinganire".

Perezida wa Komisiyo y'Igihugu y'Uburenganzira bwa Muntu Madamu Marie Claire MUKASINE

Ababyeyi bari bambaye umwambaro wa Kinyarwanda bitwaje Agaseke k'Amaharo.

Habaye umuhango wo kuremera ababyeyi bageze muzabukuru batishoboye bahabwa ibikoresho bitandukanye.

Umuturage utishoboye witwa ZIRIKWIREMBO Francoise yubakiwe inzu binyuze mu bufatanye bw'abagore bo mu karere ka Ngoma.

Abayobozi batandukanye bajye gushyikiriza Madamu ZIRIKWIREMBO Francoise inzu yubakiwe n'abagore mu rwego rwo kumutuza heza.