Kuri iki cyumweru tariki 23 Mata ku rwibutso rw’Akarere rwa Rukumberi habereye igikorwa cyo Kwibuka ku nshuro ya 29 Jenoside yakorewe abatusti mu 1994 hanashingurwa mu cyubahiro imibiri 87 y’abazize Jenoside yakorewe Abatutsi mu 1994 iherutse kuboneka mu murenge wa Rukumberi yiganjemo abari abana mu gihe cya Jenoside.

Igikorwa cyo kwibuka Jenoside yakorewe abatutsio mu 1994 cyabereye ku rwibutso rwa Rukumberi, cyitabiriwe na Minisitiri w’Ubucuruzi n’Inganda Prof. NGABITSINZE Jean Chrysostome, Guverineri w’Intara y’Iburasirazuba, CG Emmanuel K. GASANA, Umuyobozi w’Akarere ka Ngoma NIYONAGIRA Nathalie, abagize inzego z’umutekano ku rwego rw’Intara y’Iburasirazuba, Abajyanama b’Akarere ka Ngoma, abayobozi mu nzego zitangukanye, abihaye Imana hamwe n’abaturutse impande zose z’igihugu bari baje kwifatanya no gufata mu mugongo abafite ababo bashyinguye mu rwibutso rwa Rukumberi, abaharokokeye ndetse n’abaturage b’Akarere ka Ngoma muri rusange.

Bamwe mu bazi amateka ya Rukumberi bavuga ko aha ahantu ari hamwe mu duce tw’igihugu twakorewemo itegurwa rya Jenoside yakorewe Abatutsi, kuva mu kera hanyuma muri Mata 1994 ho byabaye agahumamunwa kuko abatutsi bari batuye muri aka gace batashoboraga kubona aho banyura bahunga dore ko ari ahantu hakikijwe n’amazi.

Umurenge wa Rukumberi wahoze uri muri Komine Sake mbere ya Jenoside yakorewe abatutsi mu 1994, ni ahantu hiciriwe abatutsi barenga ibihumbi 40 bajyaga baturuka mu bindi bice by’igihugu bakabazana i Rukumberi.

Uhagarariye imiryango yashyinguye ababo Bwana KABANDANA Callixte 

Bwana KABANDANA Callixte ahagarariye imiryango yashyinguye ababo mu cyubahiro yavuze ko mbere ya Jenoside abatutsi b’I rukumberi babagaho nta gihugu bafite dore ko kuva aha hantu wagombaga gusaba icyangombwa yagarutse ku bazi aho imibiri yabatutsi bishwe yaba yaragujunywe abasaba gutanga amakuru kugirango nabo bashyingurwe mu cyubahiro yagize ati: “Burya iyo ushyinguye uwawe mu cyubahiro birakuruhura turasaba abafite amakuru y’aho abantu bacu bajugunywe kuyatanga kugirango nabo bashyingurwe mu cyubahiro”

Umuyobozi w'Akarere ka Ngoma Madamu NIYONAGIRA Nathalie yihanganishije abarokotse jenoside yakorewe abatutsi mu 1994.

Umuyobozi w'Akarere NIYONAGIRA Nathalie yashimiye abaje kwifatanya n'abanyarukumberi mu kwibuka inzirakarengane zazize Jenoside yakorewe abatutsi mu 1994 avuga ko ubuyobozi bw'Akarere buzakomeza kuba hafi abarokotse yaba mu kubafasha kwita ku nzibutso zishyunguyemo ababo ndetse kubafasha kurushaho kugira imibereho myiza

Minisitiri w'Ubucuruzi n'Inganda Prof.NGABITSINZE Jean Chrysostome yitabiriye igikorwa cyo Kwibuka ku nshuro ya 29 Jenoside yakorewe abatutsi mu 1994 i Rukumberi.

Mu butumwa bwatanzwe n'umushyitsi mukuru Hon.NGABITSINZE Jean Chrysostome yagarutse ku mateka mabi yaranze igihugu cyacu akimakazwa na Leta mbi aho yagejeje u Rwanda kuri jenoside yakorewe abatutsi mu 1994 ariho yahereye yihanganishije abarokotse Jenoside yakorewe abatutsi mu 1994 b'i Rukumberi. Yagize ati: “Rukumberi amateka mabi mwanyuzemo igihugu cyacu kirayazi turasaba gukomeza kuba hafi abarokotse no kubafasha kwita ku nzibutso kugirango imibiri y’abacu bashyinguye muri uru rwibutso baruhukire ahantu heza habahesha agaciro, abarokotse mukomere muhumure ibyabaye ntibizongera ukundi kdi dukomeze kwibuka twiyubakamo imbaraga zidutera gukomera no gukora cyane twesa ikivi abacu bagiye batushije leta izakomeza kwita ku mibereho y’abarokotse Jenoside yakorewe abatutsi mu 1994”

Igikorwa cyasojwe no gushyingura mu cyubahiro imibiri 87 yabonetse no gushyira indabo ku rwibutso rwa Rukumberi rushyinguyemo imibiri isaga 42,500.