Kuri uyu wa Kane, tariki ya 21 Kanama 2025, mu Nteko Rusange y’Inama y’Igihugu y’Abagore yateguwe kubufatanye na GIZ yabereye mu Karere ka Ngoma, hashimangiwe ko abagize inama y’igihugu y’abagore bazakora ubukangurambaga bushishikariza abaturage kwimakaza umuco w’isuku n’isukura by’umwihariko iyi gahunda izibanda ku ngo 2,365 zizaba zifite ibipimo byuzuye by’isuku n’isukura bikazakorwa bitarenze umwaka w’ingengo y’imari wa 2025/2026.

Umuhuzabikorwa w’Inama y’Igihugu y’Abagore mu Karere ka Ngoma, Madamu Ernestine UMUTONI, yasobanuye ko ibi bizagerwaho binyuze mu bukangurambaga bugamije kwimakaza isuku aho ibipimo bizibandwaho birimo:

• kurangwa n’isuku ku mubiri,

• kuryama ahantu heza hatunganyije,

• kugira akarima k’igikoni,

• kugira agatanda k’amasahane,

• no kunywa amazi atetse.

Yagarutse ku ruhare rw’abagore mu gukangurira imiryango yabo kugira isuku ihoraho, kuko ari bo bafatanyabikorwa b’ibanze mu mibereho y’urugo.

Inteko yanitabiriwe n’Umuyobozi w’Akarere wungirije ushinzwe Iterambere ry’Ubukungu, Bwana MAPAMBANO NYIRIDANDI Cyriaque, washimangiye ko isuku n’isukura ari ishingiro ry’ubuzima bwiza n’iterambere. Yagize ati:

“Turashimira abagore ku ruhare bakomeje kugira mu iterambere ry’imiryango. Dusaba buri muryango gushyira imbere isuku kuko ari yo nzira yo kwirinda indwara, kubaka ubuzima buzira umuze no kugira urugo rutekanye. Nta terambere ryagerwaho nta buzima bwiza.”

Yasoje asaba abagore gukomeza kuba intangarugero mu bikorwa by’isuku no gusangiza abandi baturage ibyo biga, kugira ngo Ngoma ibe Akarere k’icyitegererezo mu kwimakaza isuku n’isukura.

Umuhuzabikorwa w'Inama y'Igihugu y'abagore Ernestine UMUTONI yiyemeje ko bagiye gufasha imiryango kwimakaza isuku n'isukura mu ngo zabo.

Umuyobozi w'Akarere wungirije ushinzwe iterambere ry'ubukungu MAPAMBANO NYIRIDANDI Cyriaque yasinyanye imihigo n'Umuhuzabikorwa w'inama y'igihugu y'abagore UMUTONI Ernestine

Abagore bahagarariye abandi ku rwego rw'imirenge bitabiriye inteko rusange y'Inama y'Igiohugu y'Abagore.

Umuyobozi w'Akarere wungirije ushinzwe iterambere ry'ubukungu MAPAMBANO NYIRIDANDI Cyriaque, Umuhuzabikorwa w'Inama y'Igihugu y'Abagore mu Karere Ernestine UMUTONI hamwe n'Umuyobozi muri GIZ bitabiriye inteko rusange y'inama y'igihugu y'abagiore ku rwego rw'Akarere ka Ngoma.

Abagize inzego z'umutekano nabo bari bitabiriye inteko rusange y'inama y'igihugu y'abagore.

Umuyobozi w'Akarere wungirije ushinzwe iterambere ry'ubukungu MAPAMBANO NYIRIDANDI Cyriaque yasabye abitabiriye inteko rusange y'Inama y'Igihugu y'Abagore kuba bandebereho.