Kuri iki cyumweru tariki ya 15/04/2015, ku Rwibutso rwa Jenoside rwa Kibungo, habereye umuhango wo kwibuka ku nshuro ya 24 Jenosdie yakorewe Abatutsi no kunamira abazize Jenoside baharuhukiye. Uyu muhango uba buri mwaka, witabiriwe n’inzego zinyuranye n’imiryango ifite ababo bashyinguye muri uru rwibutso. Twibutse ko uru Rwibutso rwa Kibungo, ruri ku rwego rw’Akarere, rushyinguyemo imibiri y’abazize Jenoside 25.000 bo mu Mirenge ya Kibungo, Remera, Kazo na Rurenge; imirimo yo kurwubaka ikaba imaze gutwara miliyoni 700.
Muri uyu muhango wari witabiriwe n’Umunyamabanga Nshingwabikorwa w’Intara y’Iburasirazuba, Bwana HABIMANA Kizito, Umuyobozi w’Akarere ka Ngoma Bwana NAMBAJE Aphrodise wari kumwe na Nyobozi yose, Perezida w’Inama Njyanama y’Akarere Bwana BANAMWANA Bernard, abayobozi b’inzego z’umutekano banyuranye, ab’amadini n’amatorero, ibigo byigenga na za Kaminuza, umushyitsi mukuru yari Depite MUKANDERA Iphygénie wari kumwe na Depite KABATSINGA Chantal. Ibiganiro byatanzwe, ubuhamya bw’uwarokotse Jenoside, indirimbo ndetse n’amagambo yahavugiwe byose byagarutse ku buryo Leta mbi n’abayobozi bazo zateguye Jenosise yakorewe Abatutsi, ubukana bwa Jenoside ndetse n’ingengabitekerezo yayiranze, ikigaragara ku buryo bunyuranye ariko byose bigasoreza ku cyizere cyo kubaho gituruka mu miyoborere myiza iranga u Rwanda.
Mu ijambo rye, Depite MUKANDERA Iphyigénie, yashimangiye ko, nyuma y’ubuyobozi bubi bwishe abaturage kandi bushinzwe kubarinda, ubu mu Rwanda hari icyizere cy’uko Jenoside itazongera ukundi kuko Abanyarwanda dufite Leta nziza igamije kubanisha Abanyarwanda; kuko n'abayihagaritse nabo barahari kandi bafite imbaraga, banafitiwe icyizere mu isi yose, byongeye n’abaturage bamaze kumenya ko ubumwe bw’Abanyarwanda ari ngombwa kuri buri wese. Yasabye ko amateka yakwandikwa akabikwa mu rwibutso rwiza Akarere ka Ngoma kubatse, ariko anashimangira ko abakuru bagomba kubwiza ukuri urubyiruko ku mateka y'u Rwanda cyane cyane aya Jenoside yakorewe Abatutsi, bakareka ibyo kurwigisha amacakubiri no “kurucanga”.
SIBOMANA Jean Bosco
PRMCO/Ngoma