Kuri uyu wa Kabiri taliki 15 Mata 2024 mu Murenge wa Kibungo, ku rwibutso rwa Jenoside Yakorewe Abatutsi, habaye igikorwa cyo Kwibuka ku nshuro ya 31 Jenoside Yakorewe Abatutsi mu 1994 no gushyingura mu cyubahiro imibiri 8 y’Abatutsi bishwe muri Jenoside yakorewe abatutsi mu 1994.

Iki gikorwa cyitabiriwe n’abayobozi batandukanye barimo Umunyamabanga Nshingwabikorwa w’Intara y’Iburasirazuba, Dr. Nyirabahimana Jeanne, ubuyobozi bw’Akarere ka Ngoma, inzego z’umutekano, imiryango ifite ababo bashyinguye muri uru rwibutso ndetse n’abaturage batuye mu Mirenge ya Kibungo, Remera, Rukira, Murama na Kazo.

Mu ijambo yagejeje ku bitabiriye iki gikorwa, Dr. Nyirabahimana Jeanne yashimangiye ko Kwibuka ari umwanya wo gusubiza agaciro abishwe bazira uko bavutse, no gukomeza kubaka ubumwe n’ubudahernwa bw’Abanyarwanda. Yagize ati: “Nihanganishije abarokotse jenoside yakorewe abatutsi ndasaba gukomera mukomeze guharanira kwiteza imbere, ndasaba abaturage mwese muri hano gukomeza guhangana n'ingengabitekerezo ya Jenoside twirinde ikintu cyose gishobora gusenya ubumwe bwacu”. 

Yakomeje asaba urubyiruko by’umwihariko gukomeza kurwanya ingengabitekerezo ya Jenoside, gutanga amakuru ku bajyanye imibiri y’abazize Jenoside itaraboneka, no gukomeza kubakira ku mateka yaranze igihugu cyacu kugira ngo amateka mabi atazasubira ukundi.

Urwibutso rwa Jenoside rwa Kibungo rushyinguyemo imibiri isaga ibihumbi 25 y’abatutsi bazize Jenoside yakorewe abatutsi mu 1994.

Mu gikorwa cyo kwibuka ku nshuro ya 31 Jenoside yakorewe abatusti mu 1994; imibiri 8 y'abazize jenoside yakorewe abatutsi yashyinguwe mu cyubahiro.

Umunyamabanga Nshingwabikorwa w'Intara y'Iburasirazuba Dr.NYIRAHABIMANA Jeanne ari kumwe n'anadi bayobozi bitabiriye igikorwa cyo kwibuka ku nshuro ya 31 Jenoside Yakorewe Abatutsi mu 1994.

Umuyobozi wa Division ya 5 Brigadier General Pascal MUHIZI yifatanyije n'Ubuyobozi bw'Akarere kwibuka ku nshuro ya 31 Jenoside Yakorewe Abatutsi mu 1994.

Umuyobozi w'urwego rw'igihugu rw'inararibonye z'u Rwanda Hon.TITO Rutaremara nawe yari yitabiriye igikorwa cyo kwibuka 31 Jenoside Yakorewe Abatutsi mu 1994.

RANGIRA Bruno Umuyobozi w'Akarere ka Kirehe n'uw'Akarere ka Karongi MUZUNGU Gerard nabo bitabiriye igikorwa cyo kwibuka ku nshuro ya 31 Jenoside yakorwe Abatutsi 1994 mu Murenge wa Kibungo.

Musenyeri Oreste INCIMATATA nawe ari mubitabiriye igikorwa cyo kwibuka ku nshuro ya 31 Jenoside Yakorewe Abatutsi mu 1994.