Kuri uyu wa Kabiri, tariki ya 12 Kanama 2025, mu nteko y’abaturage yabereye mu Karere ka Ngoma, hatangijwe ku mugaragaro Icyumweru cy’Irangamimerere, cyaranzwe n’igikorwa cy’ingenzi cyo gusezeranya imbere y’amategeko imiryango 7 yari isanzwe ituye mu buryo butemewe n’amategeko.

Iki gikorwa cyitabiriwe n’Umuyobozi w’Akarere ka Ngoma, Madamu Nathalie NIYONAGIRA, na Guverineri w’Intara y’Iburasirazuba, Bwana Pudence RUBINGISA hamwe n’abagize inzego z’umutekano, aho bombi bashimangiye ko gushyingirwa mu buryo bwemewe n’amategeko ari intambwe ikomeye mu kurengera uburenganzira bw’abashyingiranywe no guteza imbere imibereho myiza y’abagize umuryango.

Meya Nathalie NIYONAGIRA yashimye imiryango yafashe uwo mwanzuro, asaba n’abandi baturage bose bagifite izo gahunda kuzishyira mu bikorwa mu rwego rwo kubaka umuryango uhamye.

Yagizeati: "Umuryango ushyingiwe mu buryo bwemewe n’amategeko uba uhamye, uha abana uburenganzira bwuzuye kandi ugasigasira indangagaciro zacu nk’Abanyarwanda. Turashimira imiryango yafashe intambwe yo kubiheraho muri iki cyumweru cy’Irangamimerere ikiyemeza kubana mu buryo bwemewe n’amategeko ubu turizera ko mu giye gukorera hamwe mu kiteza imbere."

Na we Guverineri Pudence RUBINGISA yashimangiye ko gahunda y’Irangamimerere igamije gufasha abaturage kumenya akamaro k’amakuru yanditse neza mu bitabo by’irangamimerere, haba ku bijyanye n’ivuka, gushyingirwa no gupfa. Yagize ati:
"Iyo abaturage bose banditswe neza mu irangamimerere, byoroshya igenamigambi ry’igihugu, bikarinda amakimbirane mu miryango kandi bigateza imbere imibereho myiza. Ni inshingano za buri wese kugira amakuru yanditse mu buryo bwemewe n’amategeko mu irangamimerere kugirango tujye dushobora guhabwa serivisi."

Abaturage bitabiriye iki gikorwa bishimiye kubona abayobozi babegera mu nteko y’abaturage, bakabaha serivisi z’irangamimerere aho batuye, kandi bakabasobanurira ibyiza byo gushyingirwa no kwandikisha mu irangamimerere.

Iki cyumweru cy’Irangamimerere kizarangwa n’ibikorwa bitandukanye byo kwegera abaturage mu mirenge yose igize Akarere ka Ngoma, hagamijwe ko buri wese agira amakuru yanditse mu buryo bwemewe n’amategeko mu bitabo by’irangamimerere.