Mu gihe Umujyi wa Ngoma ukomeje kwaguka n’ibikorwa remezo bigenda byiyongera, Itorero Angilikani Kibungo ryafunguye ku mugaragaro Sitasiyo ya Lisensi yitezweho gufasha abafite ibinyabiziga kubona serivisi zihuse kandi zinoze.

Iyi sitasiyo yubatswe ku muhanda wa kaburimbo Ngoma–Rusumo, hafi ya sentire yo mu Irebezo, ikaba igiye gufasha abatwara ibinyabiziga byaba ibya Leta n’iby’abikorera kubona serivisi zijyanye na lisensi n’izindi serivisi z’ingenzi.

Umuyobozi w’Akarere wungirije ushinzwe Iterambere ry’Ubukungu, MAPAMBANO NYIRIDANDI Cyriaque, yashimye iki gikorwa cy’Itorero Angilikani Kibungo, agira ati:

“Uyu ni umusanzu ukomeye mu iterambere ry’umujyi wacu uri kugenda utera imbere. Turashimira abashyize imbaraga mu kubaka iyi sitasiyo izafasha abaturage n’abikorera muri serivisi z’imodoka. Ndakangurira abashoramari gukomeza kuzana ibikorwa byabo mu Karere ka Ngoma, kuko Akarere kacu gafite amahirwe menshi y’ishoramari atandukanye.”

Ubuyobozi bw’Akarere ka Ngoma bwiyemeje gukomeza gufatanya n’abafatanyabikorwa bose mu guteza imbere umujyi wihuta mu iterambere, ufite ibikorwa remezo byujuje ibisabwa kandi bitanga ibisubizo ku baturage.

Umujyi wa Ngoma ugize n’Imirenge 3 ariyo Kibungo, Kazo na Remera ikaba ibarizwamo sitasiyo za Essence zigera kuri eshanu ubariyemo n’iyi yafunguwe.