Kimwe n'ahandi mu Gihugu, none kuwa 07/04/2024 mu Karere ka Ngoma hatangijwe gahunda zijyanye no Kwibuka ku nshuro ya 30 Jenoside yakorewe Abatutsi. Ni igikorwa cyabereye mu murenge wa Kibungo ku rwibutso rw’Akarere ka Ngoma. Iki gikorwa cyatangirijwe ku Rwibutso rwa Jenoside rwa Kibungo, cyitabirwa n'abashyitsi batandukanye barimo Hon. Depite NDAGIJIMANA Leonard ari nawe wari Umushyitsi Mukuru, Madamu NIYONAGIRA Nathalie Umuyobozi w'Akarere ka Ngoma, Bwana BANAMWANA Beranad Perezida w'Inama Njyanama y'Akarere ka Ngoma, uhagarariye IBUKA/Ngoma, Abagize inama y'Umutekano itaguye y'Akarere ka Ngoma, Abahagarariye Amadini n'Amatorero, n'Abandi bafatanyabikorwa.

Nk'uko byari biteganyijwe, abitabiriye igikorwa cyo Kwibuka bahawe ubutumwa butandukanye binyuze mu buhamya bw'uwarokotse Jenoside, Ikiganiro cyagenewe uyu munsi, indirimbo n'ibindi bihangano.    

Umuyobozi w'Akarere Madamu NIYONAGIRA Nathalie yasabye abaturage kwirinda ingengabitekerezo ya Jenoside,gutanga amakuru y'ahantu hakiri imibiri itarashyingurwa kugirango ishyingurwe mu cyubahiro no gukomeza gufata mu mugongo abarokotse Jenoside yakorewe Abatutsi mu 1994.

Mu butumwa bwatanzwe n'umushyitsi mukuru, Hon. NDAGIJIMNA Leonard yihanganishije abarokotse Jenoside,asaba abaturage  gukomeza kubaba hafi muri ibi bihe kugira ngo bibafashe gukomera no kwiyubaka, kandi asaba ko twese twarangwa n'Ubumwe twirinda Ingengabitekerezo ya Jenoside n'ibindi byose bihembera Urwango. Yasoje ashima ingabo zari iza RPA-Inkotanyi ku bwitange n'umurava byabaranze mu rugamba rwo kubohora u Rwanda no guhagarika Jenoside yakorewe Abatutsi muri Mata 1994.

Igikorwa cyasojwe no kunamira Abarenga 25,000 bazize Jenoside yakorewe Abatutsi bashyinguwe mu Rwibutso rwa Kibungo, hanashyirwa indabo ku Mva ishyinguwemo iyo Mibiri.