Ku cyumweru taliki 05 Gicurasi 2024 ku Rwibutso rwa Rukumberi habereye igikorwa cyo Kwibuka ku nshuro ya 30 Jenoside yakorewe Abatutsi no gushyingura mu cyubahiro imibiri 12 yabonetse mu bice bitandukanye bigize umurenge wa Rukumberi.

Iki gikorwa cyitabiriwe n'abashyitsi batandukanye barimo Minisitiri w'Ubuzima Dr.NSANZIMANA Sabin, Minisitiri w'Inganda n'Ubucuruzi Prof.NGABITSINZE Jean Chrysostome, Umunyamabanga Mukuru w'Umuryango wa FPR-Inkotanyi Hon.Wellars GASAMAGERA, Guverineri w'Intara y'Iburasirazuba Bwana Pudence RUBINGISA, Perezida w'Inama Njyanama y'Akarere Bwana BANAMWANA Bernard n'abandi bajyanama, Umuyobozi w'Akarere Madamu NIYONAGIRA Nathalie n'abagize Komite Nyobozi,Abagize Inteko Ishinga Amategeko imitwe yombi, uhagarariye IBUKA ku rwego rw'Igihugu Bwana KABANDANA Callixte,Abagize inama y'Umutekano itaguye y'Intara n'iy'Akarere ka Ngoma, Abahagarariye Amadini n'Amatorero, n'Abandi bafatanyabikorwa.

Nk'uko byari biteganyijwe abitabiriye igikorwa cyo Kwibuka bahawe ubutumwa butandukanye binyuze mu Buhamya bw'uwarokotse Jenoside, Ikiganiro ku mateka ya Jenoside cyatanzwe na Senateri Hon.MUPENZI George.             

Mu butumwa bwatanzwe n'umushyitsi mukuru, Minisitiri Dr.NSANZIMANA Sabin yihanganishije abarokotse Jenoside, asaba abaturage  gukomeza kubaba hafi muri ibi bihe kugira ngo bibafashe gukomera no kwiyubaka, yongeyeho kurangwa n'Ubumwe twirinda ingengabitekerezo ya Jenoside n'ibindi byose bihembera urwango kuko Jenoside idashobora kuzongera kubaho ukundi kuko dufite ubuyobozi bwiza burangajwe imbere na Nyakubahwa Perezida wa Repubulika Paul KAGAME.

Igikorwa cyasojwe no gushyingura imibiri 12 yabonetse no kunamira abarenga 42,000 bazize Jenoside yakorewe Abatutsi bashyinguwe mu Rwibutso rwa Rukemberi, hanashyirwa indabo ku mva ishyinguwemo Abatutsi bazize Jenoside yakorewe abatutsi mu 1994.