Kuri uyu wa Kabiri taliki 04.07.2023 mu Karere ka Ngoma habaye ibirori byo Kwibohora ku nshuro ya 29 byabanjirijwe n'urugendo rwaturutse hafi ya Diyosezi Gatolika ya Kibungo rwerekeza kuri Stade ya Ngoma. Ibirori byitabiriwe n’abashyitsi batandukanye barimo n'Intumwa za Rubanda ziyobowe na Hon.Depite NYIRAHIRWA Veneranda ari kumwe na Hon.MUKANDERA Iphigenie, Hon.NDAGIJIMANA Leonard, Umuyobozi w'Akarere Madamu NIYONAGIRA Nathalie ari kumwe n'abagize Komite Nyobozi y'Akarere,Perezida w'Inama Njyanama y'Akarere Bwana BANAMWANA Bernard ari kumwe n'abandi bajyanama hamwe n' Abagize inzego z'umutekano zikorera mu karere ka Ngoma.

Bimwe mu byo abaturage bishimira byahinduye isura y’Akarere ka Ngoma mu nyaka 29 ishize harimo imihanda myiza ya kaburimbo, stade ya Ngoma, Gare nshya abagenzi bategeramo imodoka, Hoteli, amashuri, amavuriro yegerejwe abaturage, abahinzi bafashijwe kubona uburyo bwo kuhira imyaka mu rwego rwo guhangana n’imihindagurikire y’ikirere…

Ibirori byo ku #Kwibohora29 byaranzwe n'akarasisi, imikino, imbyino no kugaragariza abaturage ibyagenzweho n'ibikombe Akarere ka Ngoma kegukanye mu mwaka w'ingengo y'imari ya 2022/2023.

Umuyobozi w′Akarere ka Ngoma Niyonagira Nathalie, yavuze ko kwizihiza kwibohora ku nshuro ya 29 ari umwanya wo kurebera hamwe ibyo Abanyarwanda bagezeho, bakanongera kureba icyo kwibohora bivuze. Umuyobozi w’Akarere, yagarutse ku byiza byinshi bimaze kugerwaho muri iyi myaka 29 harimo iterambere rigaragarira buri wese, imiyoborere myiza iha Umunyarwanda wese ijambo, n′umutekano usesuye kugeza ubwo u Rwanda rusigaye rusagurira amahanga. Yagize ati: “Ubwo twizihiza ibirori byo kwibohora ku nshuro ya 29, tugomba kurushaho gusigasira ibyagezweho mu myaka 29 ishize twibuka kandi ubutwari bw’abitanze bakabohora Igihugu bagahagarika Jenoside, barangajwe imbere na Nyakubahwa Perezida wa Repubulika Paul KAGAME”.

Mu butumwa bw'umushyitsi mukuru Hon.Depite NYIRAHIRWA Veneranda yasabye Abaturage gusigasira ibyagezweho,anashimira Nyakubahwa Perezida wa Repubulika y'u Rwanda Paul KAGAME watanze amahirwe angana kubanyarwanda bose nta numwe uhejwe mu gihugu cye yasoje asaba abaturage gukurikiza icyerekezo cy′igihugu cyacu,kurushaho kunga ubumwe kuko arizo mbaraga z′igihugu cyacu avuga ko uyu munezero dufite uyu munsi ari ibitambo by'abana b'abanyarwanda bitanze kugira ngo babohore u Rwanda.

Ibirori byasojwe n’Umukino wumupira wamaguru wahuje PSF n’abakozi b’Akarere ka Ngoma urangira amakipe yombi anganya 2-2.