Muri iki gitondo, mu Murenge wa Remera habaye igikorwa cyo kwibuka ku nshuro ya 31 abagore n’abana bazize Jenoside yakorewe Abatutsi mu 1994. Ni igikorwa cyitabiriwe n’Umuyobozi w’Akarere ka Ngoma, Madamu NIYONAGIRA Nathalie, inzego z’umutekano, abayobozi mu nzego zitandukanye ndetse n’abaturage bo muri uyu Murenge wa Remera.

Igikorwa cyabanjirijwe no gushyira indabo ahari ikimenyetso cy’amateka ku Murenge wa Remera cyanditseho amazina y’abazize Jenoside yakorewe Abatutsi mu 1994, mu rwego rwo kubaha icyubahiro no gukomeza kubibuka.

Mu butumwa yagejeje ku bitabiriye iki gikorwa, Umuyobozi w’Akarere Madamu NIYONAGIRA Nathalie yashimye uruhare rw’abaturage mu gukomeza ibikorwa byo kwibuka no kurwanya ingengabitekerezo ya Jenoside. Yibukije ko kwibuka ari umwanya wo kuzirikana amateka mabi yaranze igihugu cyacu no gukomeza urugendo rwo kwiyubaka nk’Abanyarwanda.

Yagize ati: “Kwibuka abagore n’abana bazize Jenoside ni uguha agaciro ubuzima bwabo, ni no gushimangira ko tutazigera twongera kwemera ko amateka mabi nk’ayo yongera kuba mu gihugu cyacu.”

Hatanzwe kandi ubuhamya bw’abarokotse Jenoside bagaragaza inzira y’umusaraba banyuzemo mu gihe cya Jenoside n’uburyo bafashijwe gukomeza kubaho binyuze mu bufasha butandukanye bwatanzwe na Leta mu rwego rwo kubagarurira icyizere cyo kubaho.