Kuri uyu wa Gatanu taliki 02 Kanama 2024 mu Karere ka Ngoma kimwe n’ahandi hose mu gihugu hizihijwe Umuganura ku nshuro ya 13. Ibirori byo kwiziohiza Umuganura ku rwego rw’Akarere byabereye mu Mudugudu wa Rubona, Akagari ka Gatonde, Umurenge wa Kibungo ahabereye ibikorwa bitandukanye bijyanye no kwishimira ibyagezweho, guha abana amata, gusangira umusaruro wabonetse, kuremera abatishoboye n’ibindi.

Umuyobozi w’Akarere Madamu NIYONAGIRA Nathalie ari kumwe n’abagize inama y’umutekano itaguye y’Akarere ka Ngoma bifatanyije n’abaturage kwizihiza uyu munsi uba n’umwanya mwiza wo kurushaho kuzirikana umurage w’abakurambere, bishimira ibimaze kugerwaho banarebera hamwe ahakwiye gushyirwa imbaraga mu rwego rwo kongera umusaruro.

Umuyobozi w’Akarere Madamu NIYONAGIRA Nathalie mu butumwa yatanze yavuze ko Umuganura ari umwanya wo kwishimira ibyagezweho: "Uyu munsi turabashimira abaturage mwese ko mwakoresheje agaseke k'amahoro mu karemera bagenzi bacu mudategereje akimuhana, umusaruro dufite utwemerera kuganura no kuganuzanya twese, uyu ni umuco mwiza twarazwe n’abakurambere bacu kandi tugomba kuwusigasira natwe tukawuraga abakiri bato".