Kuri uyu wa kabiri tariki ya 01 Gashyantare 2022 mu karere ka Ngoma hizihijwe umunsi mukuru w’intwari z’igihugu. Ku rwego rw’Akarere uyu munsi ukaba wizihirijwe mu busitani bw’ibiro by’Akarere ka Ngoma. Mu bayobozi bitabiriye ibi birori; umushyitsi mukuru yari Senateri Hon. Nkusi Juvenal hari kandi abadepite Hon.Nyirahirwa Veneranda, Hon.Mukandera Iphigenie na Hon. Ndagijimana Leonard, Visi Perezida w’inama njyanama y’Akarere ka Ngoma Bwana BUSHAYIJA Francis, umuyobozi w’Akarere ka Ngoma Madamu NIYONAGIRA Nathalie, Umuyobozi w’ingabo mu turere twa Ngoma, Bugesera na Kirehe Lt. Col Egide NDAYIZEYE, umuyobozi wa Polisi mu karere ka Ngoma SSP James RUTAREMARA, abagize inama njyanama y’Akarere, abagize komite nyobozi y’Akarere n’abagize inama y’umutekano itaguye y’Akarere ka Ngoma.

Muri ibi birori hasinywe imihigo yo kurengera abana barindwa ihohoterwa, imirire mibi n’igwingira, gukoreshwa imirimo ivunanye, ubuzererezi n’ibindi bibangamiye imikurire myiza y’abana ndetse hanasinywe n’imihigo yo gukura abaturage mu bukene.

Mu kiganiro kigaruka ku butwarai bw’Abanyarwanda cyatanzwe na MURAYIRE Protais yibukije abitabiriye ibirori guharanira gukora ibikorwa by’ubutwari bakiriho, bakarengera abana kandi bagaharanira gukura abaturage mu bukene nkuko abakurambere bacu babiharaniye bamwe muri bo bakanahasiga ubuzima kugirango u Rwanda rubeho mu mahoro.

Umushyitsi mukuru muri ibi birori Senateri Nkusi Juvenal we yasabye abitabiriye ibirori kongera gusubiza amaso inyuma bakareba uko barimo kwitwara mu bibazo igihugu gihura nabyo harimo n'iki cyorezo cya COVID-19

Yanasabye kandi ko buri wese yongera kuzirikana insanganyamatsiko y'uyu munsi mukuru w'intwari z'igihugu igira iti: "Ubutwari mu banyarwanda, agaciro kacu"; tukibuka ko tugomba guharanira gukora ibikorwa by'ubutwari biduhesha agaciro, bigahesha ishema igihugu cyacu, tugashyigikirana kandi tukanoza ibyo dukora kurusha abandi bose. Yasabye abayobozi n'abakozi b'Akarere ndetse n'abandi bagatanga serivisi kujya bakira neza ababagana kandi bakabaha serivisi nziza kuko nabyo ari bimwe mu biranga umuntu ufite indangagaciro z’Ubutwari kandi bigatanga isura nziza ku muturage iyo agiye gushaka serisivi yizeye neza ko ayibona atabanje gusiragizwa.

Ibirori byo kwizihiza umunsi mukuru w'intwari z'igihugu byasojwe,n’umukino w'umupira w'amaguru wahuje ikipey’umurenge wa Kazo n’ikipe y'abakozi b'Akarere ka Ngoma yari iyobowe n’umuyobozi w’Akarere wungirije ushinzwe iterambere ry’ubukungu Bwana MAPAMBANO NYIRIDANDI Cyriaque.

 Uyu mukino ukaba warangiye ikipe y' Umurenge wa Kazo itsinze ikipe y'abakozi b'Akarere ibitego 3-2.