Ubwo hizihizwaga  umunsi mukuru  wo #Kwibohora27 mu karere ka Ngoma byaranzwe no gutaha bimwe mu bikorwa by’iterambere byagezweho mu mwaka wa 2021, gushyikiriza inzu abacitse ku icumu rya Jenoside yakorewe Abatutsi mu 1994, gutaha ingo mbenezamikurire y'abana bato zubatswe bivuye ku gitekerezo cy’ababyeyi ubwabo harimo urugo mbonezamikurire rwo mu kagali ka Nyagatugunda,Umurenge wa Zaza no kugabira inka imwe mu miryango ifite ababo bamugariye ku rugamba rwo kubohora igihugu cyacu.

ECD Zaza yatashwe kumugaragaro yubatswe n'ababyeyi ubwabo

Ni igikorwa cyayobowe n'umuyobozi w'Akarere wungirije ushinzwe imibereho myiza y'abaturage Madamu KIRENGA Providence ari kumwe na Reserve Force Commander James CASIUS, DPC James RUTAREMARA, Bwana Oreste HABAKURAMA umujyanama mu nama njyanama y'Akarere ka Ngona akaba n'umuyobozi wa PSF Ngoma ndetse n'itsinda ry'Abakozi b'Akarere.

Madamu KIRENGA Providence umuyobozi w'Akarere wungirije afungura kumugaragaro umuhanda Zaza-Sake

Mu butumwa yatanze kuri uyu munsi Madamu  KIRENGA Providence umuyobozi w'Akarere wungirije ushinzwe imibereho myiza y'Abaturage yatangiye ashimira ingabo zahoze ari iza RPF Inkotanyi zari ziyoboye na Nyakubahwa Perezida wa Repubulika y'u Rwanda Paul KAGAME ubwitange n'ubutwari bagaragaje mu kubohora u Rwanda n'abanyarwanda ati: "Bari bato ariko batari gito uyu munsi turi mugihugu cyiza turishimira iterambere tumaze kugeraho tubikesha ingabo za RPF inkotanyi,  turasaba buri wese gukomeza gusigasira icyo inkotanyi zaharaniye tukagira igihugu buri wese yibonamo, ibikorwa twatashye uyu munsi ni umusaruro wavuye mubyo inkotanyi zaraharaniye”