Mu mpera z’ukwezi kwa Mata 2025 mu Karere ka Ngoma hazatahwa umuyoboro uzegeza abaturage amazi meza ku baturage ku kigero cya 100%. Ayo mazi azatangwa n’uruganda rurimo gusoza imirimo yo kubakwa ku kiyaga cya Mugesera ruzuzura rutwaye amafaranga y’u Rwanda asaga miliyari 17 Frw.

Ni umuyoboro ufite ibilometero 146,3 witezweho kuzageza amazi meza ku baturage bo mu Mirenge 12 igize Akarere ka Ngoma ariyo: Zaza, Gashanda, Karembo, Rukumberi, Sake, Jarama, Mugesera, Kibungo, Rurenge, Remera, Kazo na Mutenderi, mu cyiciro cya mbere hanyuma indi mirenge ibiri isigaye ariyo Rukira na Murama nayo imiyoboro isanzwe ikoreshwa ikongererwa ubushobozi mu cyiciro cya Kabiri ndetse agakomeza ajya no mu Karere ka Kirehe mu rwego rwo kuziba icyuho cy’isaranganya ry’amazi ryari risanzwe rikorwa mu Mirenge igize ako Karere.

UWIMANA Jeanne d’Arc wo mu Murenge wa Gashanda avuga ko aya mazi agiye kubaruhura imvune bahuraga nazo bitewe n’isaranganwa ry’amazi mu gihe yabaga macye bigatuma bajya kuvoma mu kabande. 

Ati “Byatugiragaho ingaruka zirimo no gutakaza amafaranga kuko iyo amazi yabaga yabaye macye byasabaga ko asaranyanwa hirya no hino mu yindi mirenge bityo tukajya kuvoma mu kabande ndetse ukanirirwaho kubera abantu benshi bakeneye amazi ariko ubu amazi azadufasha gukora indi mirimo kuko tuzaba tuyabonera ku gihe birumvikana ko ari inkuru nziza dukenye kumva mu matwi yacu nk’abaturage kandi turashimira Leta ikora ibishoboka byose ngo ubuzima bw’abaturage bube bwiza kurushaho.” 

Mu karere ka Ngoma kwegereza abaturage amazi meza bigeze ku kigero cya 96% uyu muyoboro niwuzura abaturage bose b’Akarere ka Ngoma bazaba bashobora kugerwaho n’amazi meza ku kigero cya 100% bisobanuye ko gusaranganya amazi bigiye kuba amateka.

Ibigega bizajya byakira amazi meza aturutse ku ruganda bimaze kubakwa hirya no hino mu mirenge igiza Akarere ka Ngoma.