Kuri uyu wa kabiri mu midugudu 473 igize Akarere ka Ngoma habereye umuhango w'ihererekanyabubasha hagati ya Komite Nyobozi y'umudugudu isoje manda ndetse n'iyatowe kuwa 23-24/10/2021.

Ku rwego rw'Akarere ka Ngoma iki gikorwa cyabereye mu Mudugudu wa MPANDU, Akagari ka Karama, Umurenge wa Kazo, kitabirwa na Bwana MAPAMBANO Nyiridandi Cyriaque umuyobozi w'Akarere wungirije ushinzwe iterambere ry'ubukungu ari kumwe na SP James RUTAREMARA DPC, Capt NKUSI Augustin na UWIRAGIYE Gilbert, NISS.

Ifoto igaragaza komite y'umudugud wa Mpandu itangiye inshingano bari mu kumwe n'umuyobozi w'Akarere wungirije ndetse n'inzego z'umutekano

Madamu KAMUKAMA Anathalie ucyuye igihe ku buyobozi bw'Umudugudu yashimiye abaturage ubufatanye bagaragarije Komite Nyobozi isoje manda asaba abaturage gukomeza gufatanya na komite nshya mu iterambere ry'umudugudu wabo.

Naho umuyobozi mushya Madamu TUGIRIHIRWE Liberee yavuze ko azakomeza gushyira imbaraga mu byo abasoje manda bagezeho afatanije n'abaturage ndetse ko Umudugudu wa Mpandu uzakomeza guhanga udushya tugamije gufasha abaturage kwihuta mu iterambere.

Bwana MAPAMBANO NYIRIDANDI Cyriaque umuyobozi w’Akarere wungirije ushinzwe iterambere ry'ubukungu yashimiye abasoje Manda ubwitange bagaragaje mu gufasha abaturage gushyira mu bikorwa gahunda za Leta bityo aboneraho gusaba abashya kuba bandebereho bakarinda icyizere bagiriwe n'abaturage babatoye.

Bwana MAPAMBANO NYIRIDANDI Cyriaque umuyobozi w'Akarere wungirije ushinzwe iterambere ry'ubukungu yasabye komite yatowe gukomeza gutega amtwi abaturage

Yashimiye Abaturage kuba bariyubakiye ibiro by'Umudugudu byiza cyane, kuba bita cyane ku mutekano, kuba bafite icyumba ntangamakuru kimeze neza, kuba bafite indangamikorere y'umuryango mu mihigo ndetse n'ingamba nziza zo kwitabira ubwisungane mu kwivuza batibagiwe n’ubwizigame bw’igihe kirekire (EJO HEZA).

Nyuma yo gusinya ihererekanyabubasha abayobozi bari kumwe na Komite nyobozi yumudugu yatowe basuye umudugudu wa Mpandu bafata ifoto y'urwibutso