Umurenge wa Mugesera washimiwe ko wakoze neza umuganda mu mwaka ushize wa 2015-2016. Wanashimiwe ku gikorwa cyiza cyo kubaka inzu Polisi izajya ikoreramo, kuko kigaragaza uruhare mu gusigasira umutekano wo nkingi y’iterambere rirambye.
Uyu wa gatandatu tariki ya 30/07/2016, ni uwa gatandatu wa nyuma y’ukwezi. Nk’uko bisanzwe, mu Gihugu hose aba ari umunsi w’umuganda. Uyu muganda witabiriwe n’abayobozi bakuru harimo Minisitiri w’Urubyiruko n’Ikoranabuhanga, Bwana NSENGIMANA Philbert, Abayobozi ku rwego rw’Intara bari barangajwe imbere na Guverineri w’Intara Madame Odette UWAMARIYA, Umuyobozi w’Ingabo mu Ntara y’Iburazirazuba n’Umujyi wa Kigali Major General MUBARAK MUGANGA. Abo bashyitsi bakaba barakiriwe na Nyobozi y’Akarere yari irangajwe imbere n’Umuyobozi w’Akarere, Bwana NAMBAJE Aphrodise wari kumwe n’Umuyobozi w’Ingabo mu Turere twa Ngoma, Kirehe na Bugesera Col. Bertin Mukasa CYUBAHIRO na DPC SSP Janvier MUTAGANDA.
Uyu muganda wabereye mu Murenge wa Mugesera mu rwego rwo kugira ngo uyu murenge ushimirwe ku bikorwa by’umuganda wakoze byiza, byatumye uba uwa kane ku rwego rw’Igihugu ugahabwa n’Igihembo cy’amafaranga ibihumbi Magana atanu. Uyu muganda ukaba wari umwanya wo kugeza ku baturage ba Mugesera icyo gihembo bakesha kuba barakoze imihanda myiza hafi ibirometero 11 mu murima w’inanasi ushimishije ufite hegitari 800.
Nyuma yo gusura iyo mihanda yo mu nanasi, abayobozi baje kwifatanya n’abaturage mu gikorwa batangiye cyo kubaka inyubako Polisi y’Igihugu izakoreramo kugira ngo uwo Murenge nawo ugire abapolisi hafi. Iki gikorwa nacyo kikaba ari icyo gushimwa no gushyigikirwa kuko iyo nyubako ya Polisi ari abaturage ubwabo biyemeje kuyubaka. Abaturage bakaba bagaragaza ibyishimo mu kubaka iyo nzu kuko bagiye kubona serivisi za Polisi hafi.
Mu ijambo rye Minisitiri NSENGIMANA Philbert yashimiye abaturage ba Mugesera kuba bitabiriye ari benshi, ibyo bikaba bigaragaza impamvu babaye indashyikirwa mu muganda bakoze wo gukora imihanda myiza mu murima w’inanasi yari yasuye, munini cyane; bakabihemberwa ku rwego rw'Iguhugu. Yabashimiye kandi umuganda bakoze wo kubaka inzu ya Polisi biyemeje kwiyegereza. Yababwiye ko icyo gikorwa kigaragaza ko bazi neza akamaro k’umutekano kuko ariwo musingi w’iterambere rirambye. Ku birebana n’umunsi w’umuganura Minisitiri NSENGIMANA Philbert yabwiye abaturage ko  nyuma yo gusabana, bagomba kureba inyuma bakishimira ibyo bamaze kugeraho, bagafata ingamba zihamye zo gukomeza kwiteza imbere. Yabasabye gutegura neza igihembwe cy’ihinga 2017A kugira ngo bazeze neza bityo birinde ikibazo cy'inzara kivuga hamwe na hamwe. Yashoje yemerera abaturage b'Akarere ka Ngoma kuzababera intumwa nziza muri Guverinoma.

By SIBOMANA Jean Bosco
PRMCO/NGOMA