Kuva tariki ya 21 kugeza 23 Kamena 2016, mu Karere ka Ngoma habereye imurikabikorwa(Open Day). Icyo gikorwa kikaba cyarateguwe n’Ubuyobozi bw’Akarere ka Ngoma bufatanyayije n’abafatanyabikorwa banyuranye bagakoreramo, byaba ibigo bya Leta, Ibigo by’Abikorera, amakoperative, bihuriye mu Ihuriro ry’Abafatanyabikorwa mu iterambere (JADF: Joint Action Development Forum).
Muri icyo gikorwa cy’imurikabikorwa, hamuritswe ibikorwa byinshi mu bice binyuranye by'ubuzima , uburezi, ubuvuzi, ubuhinzi, ikoranabuhanga, ibikorwaremezo, ubukorikori, inganda, nk’uko bigaragazwa n’abitabiriye icyo gikorwa  bagera kuri 43:
-    Imiryango Mpuzamahanga itegamiye kuri Leta: 4
-    Imiryango itegamiye kuri Leta yo mu Gihugu: 4
-    Kaminuza  zikorera mu karere ka Ngoma: 4
-    Ibigo bya Leta n’iby’Abikorera: 4
-    Amashyirahamwe: 18
-    Kompanyi: 11
Twibutse  ko iri murikabikorwa ryari rigamije kwerekana ibikorwa no gusobanurira abarigana, ntiryari rishyize imbere kugurisha. Nko mu cyumba cy’Akarere basobanuriye abaturage serivisi zitangwa mu Karere(Service Charters), ibibazo bikunze kwibazwa mu butaka, dore ko usanga ari byo bibazo bigaragara cyane,  ari nako herekanwa igishushanyo mbonera(Master Plan) cy’umujyi wa ngoma ndetse n’ibikombe n’imidari Akarere kamanze kubona ku rwego rw’Igihugu kubera ubudashyikirwa kagaragaza mu ngeri zinyuranye, gakesha ubufatanye busesuye bw’Abafatanyabikorwa mu mihigo.
Ku munsi wo gusoza iryo murikabikorwa, tariki ya 23/06/2016, Akarere ka Ngoma kateguye urugendo rw’abafatanyabikorwa rugamije kubereka aho Akarere kageze mu bikorwa binyuranye mu mibereho y’abaturage n’iterambere. Muri urwo rugendo, hasuwe umushinga wo gukora urugomero rw’amazi yo kuhira imirima mu Mirenge wa REMERA-RURENGE; uwo umushinga uteganya kuhira hegitari 300 z’ubutaka burimo n’ubwo mu misozi, ukaba ukorwa n’Abayapani. Hasuwe Hotel y’inyenyeri eshatu, yubakwa n’Akarere binyuze mu Kigo cy’Igihugu Gishinzwe iterambere mu Nzego z'ibanze(LODA: Local Development Agency). Ikaba igeze kuri  97%. Hasuwe n’Agakiriro kazatangira gukoreramo mu kwezi kwa 07/2016, hasurwa urwibutso rushya rwa Jenoside yakorewe Abatutsi, rwubatswe mu Murenge wa Kibungo, urwo rwibutso rukaba ruzimurirwamo imibiri mu minsi ya vuba. Mu bikorwa byo kuvugurura umujyi wa Ngoma hasuwe na none uduhanda dutatu tw’amabuye turiho amatara ya ninjoro. Urwo ruzinduko rwo kwihera amaso aho ibikorwa by’Akarere ka Ngoma bigeze rwashorejwe ku Ishuri Rikuru rya IPRC-East. Uretse gutanga amasomo asanzwe y’icyiciro gikuru, hanatangirwa amahugurwa mu bumenyingiro mu gihe gito, harimo n’arebana no kwakira no gusabanira abatugana (Hospitality). Ibyo bikaba bikorwa n’abahanga kandi bigakorerwa ahantu heza, hari n’ibikoresho bigezweho mu by’amahoteri.
Icyagaragaye muri urwo rugendo ni uko ibikorwa bya Leta binyuranye ari byinshi kandi byiza, bikaba bigaragarira buri wese, ariko abikorera ku giti cyabo bo mu Mujyi wa Ngoma, bakaba bagenda biguru ntege muri gahunda yo kuvugurura Umujyi.
Uhagarariye abafatanyabikorwa akaba yarashimye Akarere kuri iki gikorwa cy’imurikabikorwa, uko cyateguwe neza. Ariko avuga ko urugendo bavuyemo  rugaragaje ko Akarere ka Ngoma gakataje mu iterambere. Bakaba bishimiye ibikorwa byinshi kandi byiza bikarimo. Yijeje ubufatanye busesuye kugira ngo Akarere gakomeze gutera imbere. Mu rwego rwo gushimira abafatanyabikorwa, hatatanzwe amashimo ya za certificats.
Mu ijambo ryo gusoza iryo murikabikorwa, Umuyobozi w’akarere wungirije ushinzwe iterambere ry’Ubukungu, ari nawe wari umushyitsi mukuru, Bwana RWIRIRIZA JMVianney yashimiye abafatanyabikorwa mu bikorwa binyuranye bakora, ariko cyane cyane abitabiriye imurikabikorwa. Yashimiye cyane ubufatanye bw’inzego z’umutekano mu bikorwa binyuranye ariko by’umwihariko ku mutekano useseuye waranze icyo gikorwa, ku mudedenzo n’umutekano biri mu Gihugu muri rusange kuko ari byo musingi ibintu byose byubakiyeho. Yavuzeko u Rwanda rufite aho ruvuye, aho rugeze heza, ko Abanyarwanda tugomba gukomereza aho, tugakaza umurego, tukihesha agaciro. Tugahora tuzirikana ko ibyo byose, umutekano, iterambere rigaragarira buri wese, tubikesha imiyoborere myiza irangajwe imbere na Nyakubahwa Perezida wa Repubulika Paul KAGAME. By SIBOMANA Jean Bosco
PRMCO/NGOMA