Kuri uyu wa kane, mu Karere ka Ngoma habereye ikiganiro cyahariwe gusobanurira abakozi gahunda yo kurwanya ihohoterwa rishingiye ku gitsina rikorerwa mu kazi. Iki kiganiro cyateguwe ku bufatanye n’Urwego rw’Igihugu rushinzwe kugenzura iyubahirizwa ry’uburinganire (@GenderMonitorRw) kikaba cyatanzwe na RURIHOSE Florien, Umugenzuzi Mukuru w’Uburinganire wungirije, ari kumwe n’Umuyobozi w’Imirimo Rusange mu Karere ka Ngoma, TUMWINE Innocent.

Mu butumwa bwe, RURIHOSE Florien yashimangiye ko ihohoterwa rishingiye ku gitsina ari ikibazo gikwiye kurwanywa buri gihe, cyane cyane mu kazi, kuko gisenya uburenganzira bwa muntu ndetse kikadindiza imikorere y’inzego. Yagize ati:
“Umukozi wese agomba kumva ko afite uburenganzira bwo gukora mu mutekano, mu bwisanzure no mu cyubahiro. Kurwanya ihohoterwa rishingiye ku gitsina si inshingano z’umuntu umwe, ahubwo ni inshingano za buri wese. Tugomba kubaka umuco w’akazi urangwa n’icyubahiro no gusaranganya amahirwe.”

Naho TUMWINE Innocent, Umuyobozi w’Imirimo Rusange mu Karere, yashimiye abakozi bitabiriye ikiganiro, abibutsa ko ubuyobozi bw’Akarere buha agaciro cyane kurwanya ihohoterwa mu kazi. Yagize ati: “Ntitwifuza kubona umukozi n’umwe wumva ababajwe cyangwa atagishoboye gukora neza kubera ihohoterwa. Turashishikariza buri wese gukumira no gutanga amakuru igihe habaye ibikorwa nk’ibi. Ubuyobozi bw’Akarere buzakomeza gushyigikira gahunda zigamije kurengera uburenganzira bw’abakozi.”

Iki kiganiro cyitabiriwe n’abakozi b’Akarere bakorera ku cyicaro cy’Akarere ka Ngoma, cyaranzwe no kungurana ibitekerezo bigamije gusobanukirwa neza uko ihohoterwa rishingiye ku gitsina rishobora kugaragara, uburyo bwo kurirwanya no gukumira ko rikorerwa mu kazi.

Umuybozi w'Imirimo rusange TUMWINE Innocent ari kumwe n'Umugenzi mukuru w'uburinganire wungirije RURIHOSE Florien

Abakozi bitabiriye ikiganiro ku kurwanya ihohoterwa rishingiye ku gitsina rikorerwa mu kazi. 

Umugenzuzi Mukuru w'uburinganire wungirije RURIHOSE Florien yatanze ikiganiro ku kuranwanya ihohoterwa rishingiye ku gitsina rikorerwa mu kazi