Kuri uyu wa gatanu, tariki ya 22/04/2016, intumwa za rubanda mu mutwe wa Sena zakoreye urugendo mu karere ka NGOMA. Abo Basenateri bo muri komisiyo y’Imibereho myiza,ni Senateri NYAGAHURA Marguerite na Senateri NTAWUKURIRYAYO Jean Damascène, bari mu ngendo mu Gihugu bagamije  kuganira no kungurana ibitekerezo n’inzego zinyuranye zifite mu nshingano zazo ubuzima ku kibazo cy'indwara zitandura. Izo ntumwa za rubanda zakiriwe n’Umuyobozi Wungirije w’Akarere ushinzwe Imibereho myiza, Madame KIRENGA Providence. Ibiganiro bikaba byari bitumiwemo Komite za Mutuelle de Santé, abayobozi b’Ibigo nderabuzima, Abakozi bashinzwe imibereho myiza mu Mirenge irimo ibigo nderabuzima, Abakangurambaga b’ubuzima ku rwego rw’Akarere. Mu guha abashyitsi ikaze, Umuyobozi w’Akarere Wungirije ushinzwe imibereho myiza, Madame KIRENGA Providence, yavuze ko Akarere kafashe ingamba zo kugeza ku baturage bako serivisi zo kwita kuri izo ndwara.  Kuri ubu serivisi zo kwita ku ndwara zitandura ziboneka mu bigo nderabuzima byose by’akarere, kakaba karatangiye ubukangurambaga bwimbitse kuri  izo ndwara mu kwezi 02/2015. Na none, ubu hari Abaganga bahuguwe, abaturage nabo bakaba bitabira izo serivisi mu bwinshi, kuko zabegereye.
Senateri NYAGAHURA Marguerite, akaba na Visi-Perezida w’iyo Komisiyo,, yavuze ko nk’Intumwa za rubanda zisanzwe zifite inshingano yo kugenzura imikorere ya Leta, bari mu ngendo mu Gihugu hose muri ibyo bikorwa bisanzwe by’ubugenzuzi. Bakaba bashaka kureba rero ibikorwa bya Leta mu gukumira no kuvura izo ndwara zitandura. Yavuze ko indwara zitandura zisigaye ari ibyorezo bikomeye binganyikishije isi kuko izo ndwara ubwazo zahitaye abantu basaga miliyoni 36 mu myaka itanu ishize, zikaba zifite ikigereranyo cya 60% mu ndwara zica abantu. Mu Rwanda naho bikaba bigaragra ko izo ndwara zigenda ziyongera kuko muri  2011, zagaraye ku rwego rwa 29% mu ndwara zahitanye abantu, naho muri 2014 zigera kuri 30%. Izo Ndwara zitandura akaba ari indwara zinyuranye zifata ibice binyuranye by’umuntu. Zikaba zirimo indwara z’umutima n’umuvuduko w’amaraso, diyabeti,  imbyiko, Kanseri n’izindi. Senateri NYAGAHURA Marguerite akaba yasabye abitabiriye ibyo biganiro kugira ubwisanzure buhagije kugira ngo ibiganiro bivemo koko ingamba n’amakuru ahagije kugira ngo hatangwe ibitekerezo byatuma hatangwa icyerekezo cyafasha Leta guhangana n’izo ndwara.

By SIBOMANA Jean Bosco
PRMCO/NGOMA