Mu Karere ka Ngoma, abaturage barakangurirwa gutegura neza ubutaka bwose bugomba guhingwa mu gihe bategereje ko imvura igwa, kugira ngo hatangire igihembwe cy’ihinga 2026A.

Ubuyobozi bw’Akarere buvuga ko iyo umuturage ateguye neza umurima we, agakoresha imbuto y’indobanure ndetse n’ifumbire ntakabuza abona umusaruro mwinshi kandi mwiza. Ibi bituma imibereho y’imiryango irushaho gutera imbere kandi umusaruro w’ubuhinzi ukarushaho kwiyongera.

Umuyobozi w’Akarere wungirije ushinzwe iterambere ry’ubukungu, MAPAMBANO NYIRIDANDI Cyriaque, asaba abaturage bose kwihutira gutegura neza umurima wabo, bakarushaho gukoresha imbuto z’indobanure n’ifumbire ikwiriye. Yanashimangiye ko imyiteguro myiza ari yo shingiro ry’umusaruro mwiza kandi ko abaturage bagomba gufata umwanya wo gutegura neza umurima mbere y’uko imvura igwa. Ati: "Turakangurira buri muturage gutegura neza ubutaka bwe, gukoresha imbuto z’indobanure n’ifumbire, kugira ngo igihembwe cy’ihinga 2026A kizabe icy’umusaruro mwinshi kandi mwiza bityo tuzashobore kwihaza mu biribwa ndetse dusagurire n’amasoko tubashe kwiteza imbere mu Karere kacu.”

Ubuyobozi bw’Akarere buributsa abaturage gutegura ubutaka bwose bugomba guhingwa muri iki gihembwe ntihazagire ahasigara hadahinze kuko bishobora gutuma ingano y’umusaruro wotezwe ugabanuka.

Abaturage mu Mirenge igize Akarere ka Ngoma barimo gutegura imirima yabo bitegura igihembe cy'ihinga 2026A.