Ni mu nama yahuje abafatanyabikorwa banyuranye mu buhinzi, yabaye kuri uyu wa gatatu tariki ya 24/02/2016, hafatiwe uwo mwanzuro ukomeye wo gukumira abamamyi.
Ubuyobozi bw’Akarere bwatumije iyo nama, bugamije gusuzuma uburyo umusaruro w’Igihembwe cya mbere cy’ihinga 2016 cyagenze ku bihingwa by’ibigori n’ibishyimbo, bityo bunafatire hamwe n’abahinzi ndetse n’abandi bafatanyabikorwa ingamba nziza zirebana n’ibikorwa byo guhunika no kugurisha umusaruro, hirindwa abamamyi. Iyo nama yayobowe na Agronome w’Akarere ka NGOMA, Bwana NIYONGABIRE Janvier, yari yatumiwemo Abagoronome b’Imirenge ndetse n’abakozi bahagaraiye Ikigo cy’Igihugu gishinzwe ubuhinzi(RAB). By’umwihariko hari Bwana KANYANKORE Christophe, umuyobozi wa BABC( BUGESERA Agri- Business Company), sosiyete ishinzwe guhunika no gutunganya umusaruro w’igihingwa cy’ikigori, hari kandi n’Abakozi bahagarariye Ikigo cy’Imari cya UOB(Urwego Opportunity Bank).  
Abayobozi b’amakoperative bari bahagarariye abahinzi muri iyo nama, bagaragaje ko umusaruro bawufite, kandi bafashe ingamba zo kuwukusanya bakawugurisha na BABC, kuko uyu mushoramari yabakoreye ibintu byinshi byiza birimo kubona ikigo cy’imari UOB, cyabahaye amafaranga yo kugura inyongeramusaruro, ubu kikaba kibafasha no gukusanya umusaruro. Nk’uko umuyobozi wa BABC, Bwana KANYANKORE Christophe yabivuze, BABC ifitanye n’amakoperative ahinga ibigori amasezerano yo kugura umusaruro wayo wose; ayo masezerano akaba yarashingiweho na UOB, mu guha amakoperative y’abahinzi, inguzanyo zo kugura inyongeramusaruro bakeneye mu guhinga ndetse no kubona amafaranga yo gukusanya uwo musaruro, nta yindi ngwate batanze. Inama rero ikaba ayari igamije kwibutsa buri wese ayo masezerano, ariko cyane cyane gushimangira ingamba zo gukusanya umusaruro no kwitandukanya n’abamamyi. Bwana KANYANKORE Christophe akaba yarabwiye  amakoperative ko hari ubuhinikiro bafite mu Ntara y’Iburasirazuba I Musha na Rwinkwavu, no ku ruganda I Nyamata. Ko bashobora kugemura kuri ubwo buhunikiro cyangwa se BABC ikabasanga iwabo. Yababwiye kandi ko amafaranga ahari, ko utanze umusaruro we ahita yishyurwa.

Abajiwe akamaro k’iyi nama, Perezida w’Ihuriro ry’Abahinzi b’Ibigori  ba Ngoma(IAI-Ngoma), Bwana MUTABARUKA Samuel, yavuze ko bahuriye mu nama koko ari abantu bahuriye ku gikorwa cy’ubuhinzi bw’ibigori. Yavuze ko Akarere kabafashije muri byinshi harimo kubahuza bagakora ihuriro ry’abahinzi b’ibigori, kabahaye amahugurwa arebana no gukoresha inyongeramusaruro ndetse no guhuza ubutaka. Ati” Kubera amahugurwa y’abagoronome, twabonye umusaruro mwiza. Twishimiye umusaruro wacu, tukaba dushima cyane Leta y’ubumwe bw’Abanyarwanda itubereye maso. Twiyemeje kandi guha umusaruro wacu BABC, kuko yadufashije cyane itubonera Iki kigo cy’Imari cy’Urwego. Umusaruro wacu tuzawugurisha BABC kuko tuyikesha byinshi byiza. Uretse kandi n’amasezerano dufitanye tugomba kubahiriza, yaduhaye n’ibiciro byiza.” Umukozi w’Umushinga wa MINAGRI witwa PASP(Climate Resilient Post-harvest and Agribusiness Support Project) mu Karere ka NGOMA, Bwana MASENGESHO Michel, wari muri iyo nama nawe akaba yasezeranyije abahinzi n’uwo muguzi BABC, ko umushinga uzabafasha mu gufata neza uwo musaruro kugira ngo uzagere ku isoko wujuje ubuziranenge.
Sosiyete BABC, ikaba yari yaje iri kumwe n’impuguke mu by’ubuhinzi, harimo Muzehe NTAGANDA Thaddée, wagaragarije abahinzi inyongeramusaruro nziza, kandi zidahenze, zishobora gutuma umusaruro wabo wikuba kabiri.

By SIBOMANA Jean Bosco
PRMCO/NGOMA