“Impamvu twaje hano kwifatanya namwe gutangiza igihembwe cy’ihinga, ni ukugira ngo tubakangurire guhinga vuba, mutegura imirima neza, mugura imbuto n’inyongeramusaruro”.
Ayo ni amwe mu magambo  Guverineri w’Intara y’Iburasirazuba, Madame Odette UWAMARIYA yavugiye mu gikorwa cyo gutangiza igihembwe cy’ihinga 2017A, mu Karere ka Ngoma, kuri uyu wa gatandatu tariki ya 24/09/2016.
Ubusanzwe uwa gatandatu wa nyuma w’ukwezi, aba ari umunsi w’umuganda mu Gihugu hose. Uyu munsi  Guverineri akaba yaje mu Karere ka NGOMA,  kwifatanya n’abaturage mu muganda usa n'udasanzwe  wakozwemo igikorwa cy’ingirakamaro cyo gutangiza igihembwe cy’ihinga 2017A. Uwo muganda ukaba wabereye mu mirima yahujwe kuri hegitari 315, iri mu gikombe gihuriweho n’utugari twa Mutengeri na Muzingira mu Murenge wa Mutenderi.
Mu biganiro binyuranye byatanzwe, harimo icyatanzwe n’Umuyobozi w’Akarere ka NGOMA, Bwana NAMBAJE Aphrodise, watanze ikiganiro  cyo gukangurira abaturage b’Akarere ka Ngoma kumenya umuryango w’Ibihugu by’Afurika y’Iburasirazuba(EAC) no kuwubyaza inyungu zishingiye ku buhahirane n’ubusabane. Yashimiye abaturage ba Mutenderi ku bwitabire bwiza bagaragaza mu bikorwa binyuranye.
Bwana SENDEGE Norbert, Umuyoboziwa RAB mu Ntara y’Iburasirazuba yashimye uburyo bwo kwigishiriza mu murima bwakoreshejwe mbere yo gutangira gutera imbuto. Yabwiye abaturage ko n’ubwo imbuto zinyuranye zitararangiza kubageraho zose, bakomezanya umurava bafite wo gutegura imirima kuko mu cyumweru kimwe imbuto zose baraba bazibonye. Yabibukije kandi ko uretse ibihingwa by’ibigori, ibishyimbo, soya ndetse n’imyumbati, bagomba kwita cyane no ku gihingwa cy’urutoki kuko iyo habaye ikibazo nk'icyabaye cy'izuba ryinshi, kibarengera ntibasonze.
Mu ijambo rye, umushyitsi mukuru muri iki gikorwa cyo gutangiza igihembwe cy’ihinga, Guverineri w’Intara y’Iburasirazuba, Madame Odette UWAMARIYA, yibukije akamaro k’umuganda mu iterambere ry’Igihugu cyacu. Naho ubwo yasobanuraga impamvu bahisemo kuza mu Karere ka Ngoma yagize ati” Impamvu twaje hano kwifatanya namwe gutangiza igihembwe cy’ihinga, ni ukugira ngo tubakangurire guhinga vuba, mutegura imirima neza, mugura imbuto n’inyongeramusaruro”. Ku kibazo cy'imbuto n'inyongeramusaruro yagize ati” Hashize iminsi hakurikiranwa ikibazo cy’imbuto n’inyongeramusaruro. Nkaba nsaba ababishinzwe ko imbuto n’ifumbire biza vuba, namwe mukanoza uruhare rwanyu rwo gutegura imirima, mukitabira no kuzigura”.

Guverineri yabwiye abaturage ko ibihe bibi by’amapfa byabaye mu Ntara y’Iburasirazuba bigomba kudusigira twese amasomo anyuranye. Hakaba harafashwe ingamba zikomeye kandi zirambye, harimo no kuhira hakoreshejwe utumoteri duto. Yaboneyeho gushimira Leta y’u Rwanda iyobowe na Nyakubahwa Perezida wa Repubulika Paul KAGAME, ku rukundo rukomeye yagaragarije abaturage bari bugarijwe n’icyo kiza cy’amapfa, ikabaha ibiribwa ndetse n’amazi mu matungo yabo. Ariko igishimishije ni uko n'ibyo biribwa byahashywe mu tundi duce tw’Igihugu cyacu. Yashoje ashishikariza abantu kugira isuku ku mubiri, aho batuye, ariko by'umwihariko ahwitura abagore abasaba kwita  ku isuku y’urugo n’abana.
By SIBOMANA Jean Bosco
PRMCO/NGOMA