Kuri uyu wa gatatu tariki ya 29/03/2017, Guverineri w’Intara y’Iburasirazuba Madame KAZAIRE Judith yasuye Abaturage bo mu Murenge wa Jarama, Akarere ka Ngoma.  Uru ruziduko rwabaye umwanya mwiza wo kuganira nabo no kubaha impanuro zinyuranye.

Ni uruzinduko rwabaye mu rwego rwo gutangiza ku mugaragaro gahunda y’icyumweru cyahariwe ubufasha mu mategeko(Legal Aid Week). Guverineri w’Intara Madame KAZAIRE Judith, yakiriwe n’Umuyobozi w’Akarere ka Ngoma, Bwana NAMBAJE Aphrodise wari kumwe n’Abayobozi b’Inzego z’Umutekano, Ushinzwe Ingabo Col. Bertin Mukasa CYUBAHIRO na DPC SSP Janvier MUTAGANDA.

Muri rusange, muri iki cyumweru cyahariwe ubufasha mu by'amategeko gifite insanganyamatsiko igira iti "Haranira guhabwa ubutabera kuko ari uburenganzira bwawe" , abaturage mu mirenge inyuranye y’Akarere ka Ngoma basobanuriwe amategeko ariko cyane cyane itegeko ry’umuryango, bashishikarizwa kurangiza imanza za Gacaca zirebana n’umutungo, ndetse bakemurirwa n’ibindi bibazo.
Mu kuganira n’abaturage, Guverineri KAZAIRE Judith yashimiye abaturage b’umurenge wa Jarama ukuntu bitabira umurimo, bakiteza imbere ariko ababwira ko yababajwe cyane n’umubyeyi wapfuye yishwe n’umugabo we. Guverineri yatanze inama zikurikira:
-    Kurangiza imanza za Gacaca vuba;
-    Kurwanya ibiyobyabwenge;
-    Kwirinda urugomo;
-    Kurwanya ruswa n’akarengane;
-    Guharanira uburenganzira bwabo;
-    Kurwanya igurishwa ry’abantu ariko ababyeyi bakaba maso cyane;
-    Kwitegura kwibuka Jenoside ku nshuro ya 23;
-    Kugira isuku;
-    Kunoza imyiteguro y’amatora ya Perezida wa Repubulika.

Mu bibazo byagaragajwe n’abaturage harimo icy’uko bacikanywe no kwandikisha abana mu gihe Leta yari yatanze cyo kubikora nta mande, bakaba bagaragaza ko babaye benshi ku buryo umukozi ushinzwe irangamimerere atabashije kurangiza kwandika abo bana mu mezi abiri gusa, bityo bakaba basaba ko bakongera gukomorerwa. Nyakubahwa Guverineri  yasabye Akarere n’umurenge kwita kuri icyo kibazo, bagakomeza gahunda ya buri cyumweru yari igaragajwe n’Umurenge, yizeza ubuvugizi bushoboka kuri icyo kibazo. Hagaragaye kandi ikibazo cy’abaturage benshi na Rwiyemezamirimo ECOCAS, wabakoresheje mu materasi akabambura amafaranga 33.731.00. Ubuyobozi bw’Akarere bwagaragaje uko bwagiye bufasha abaturage muri icyo kibazo kugeza bubafasha  kujya mu Nkiko. Ariko ikibazo cy’amagarama kikaba gikomereye benshi, dore hari abambuwe amafaranga ari munsi y’igarama. Guverineri yasabye akarere gukomeza gufasha abaturage muri izo nzira z'inkiko kubo byashobotse, ariko  n’inzira y’ibiganiro na Rwiyemezamirimo ikaba yakongera kugeragezwa, cyane ko adahakana ko afitiye abaturage amafaranga.

By SIBOMANA Jean Bosco
PRMCO/NGOMA