Kuri uyu wa kabiri tariki ya 22/03/2016, Koperative Rebakure Munyamurama(KOREMU) yo mu karere ka NGOMA, yasuwe na bamwe mu bayobozi bakuru b’Ikigega Mpuzamahanga gishinzwe guteza imbere ubuhinzi IFAD(Interantional Fund for Agriciture Development), bari bari kumwe n’Abakozi bo muri Minisiteri y’Ubuhinzi n’Ubworozi n’ab’Imishinga iyishamikiyeho.
Abo bashyitsi ni Sana Jatta Umuyoboziwa IFAD ushinzwe Afrika y’Iburasirazuba  n’Amajyepfo na Addfo Brizzi Umujyanama mu bya politiki ya tekiniki muri IFAD bombi bakorera ku Cyicaro Gikuru cya IFAD I Roma. Bari baherekejwe na Francisco Pichon Javier Ushinzwe IFAD mu Rwanda na GASIRABO Claver ushinzwe imishinga iterwa inkunga na IFAD ariyo, SPIU, KWAMP, PRICE na PASP. Aba bashyitsi bakiriwe n’Umukozi wari watumwe n’Akarere, Bwana HAKUZWIMANA Gédéon afatanyije n’Umunyamabanga nshingwabikorwa w’Umurenge wa MURAMA, Bwana BUHIGA Josué n’Umukozi wa PASP mu karere ka NGOMA, Bwana MASENGESHO Michel.
Bamaze kuganira n’abayobozi ba KOREMU no gusobanurirwa neza imikorere ya PASP na Madamu ZIGIRIZA Lucia, abashyitsi basuye ubwanikiro maze bishimira ibikorwa bya PASP n'urwego Koperative KOREMU igezeho yiyubaka. Bashimye ubuyobozi bw’Akarere ka NGOMA banabusaba gukomeza kuba hafi Koperative KOREMU, kugira ngo hato na hato itazahura n’ibibazo by’imicungire mibi bikunze kumunga amakoperative.
Aganira n’Itangazamakuru, Bwana Sana Jatta yabwiye mu magambo make abanyamakuru ko yishimira intambwe Ubuyobozi bw’u Rwanda bugezeho mu guteza imbere Igihugu imbere, ariko cyane cyane ashima uko u Rwanda rukoresha neza amafaranga y’imishinga yo guteza imbere abaturage.
Naho Perezida wa KOREMU, Bwana BAZIRUWUNGUKA Jean Pierre, akaba  yarahamirije abari aho bose ko PASP yazamuye KOREMU ku rwego rushimishije. Nyuma y’amahugurwa yabongereye ubumenyi mu gufata neza umusaruro, ubu Koperative yavuye kuri toni 200 igera kuri toni 700 zujuje ubuziranenge bukenewe ku isoko. Yashimye cyane inkunga y’ubwanikiro bugezweho n’imodoka ya Fuso batewemo inkunga na PASP.
Muri rusange  KOREMU ni koperative ubona koko ifite icyerekezo cyiza, kuko n’ubwo PASP yabateye inkunga, uruhare runini rw’ibimaze kugerwaho ni umusaruro w’imbagara zabo. Uretse ubwo bwanikiro n’imidoka PASP yabateyeho inkunga ingana na 40%, hari ibindi bikorwa byiza bikoreye harimo imashini ya moteri ihungura ibigori. Nk’uko abanyamuryango ba KOREMU babivugana ibyishimo, iyi mashini ihungura yarabaruhuye cyane kuko ibigori bashoboraga guhungura mu byumweru bibiri,  iyo mashini ibihungura umunsi umwe gusa.
By SIBOMANA Jean Bosco
PRMCO/NGOMA