Tariki ya 3 Ukuboza 2023, mu murenge wa Kibungo, kuri stade Ngoma hizihirijwe ku rwego rw'Igihugu Umunsi Mpuzamahanga w'abantu bafite ubumuga ku nsanganyamatsiko igira iti: "Dufatanye n'abantu bafite ubumuga, tugere ku ntego z'iterambere rirambye".

Ibi birori byitabiriwe na Minisitiri w’Ubutyegetsi bw’Igihugu Bwana MUSABYIMANA Jean Claude n’abandi bashyitsi batandukanye barimo Umunyamabanga Nshingwabikorwa w'Intara y'Iburasirazuba Dr.NYIRAHABIMANA Jeanne, Depite Musolini Eugene uhagarariye abafite ubumuga mu Nteko Inshingamategeko y'u Rwanda, abagize Komite Nyobozi y'Akarere, Abahagarariye imiryango mpuzamahanga, Abahagarariye inama y'igihugu y'abantu bafite ubumuga, Abagize inama y'umutekano itaguye y'Intara n'Akarere, intumwa zaturutse muri EALA hamwe n'abandi bafatanyabikorwa batandukanye.. 

Mu kwizihiza uyu munsi, abafite ubumuga bahabwa inyunganirangingo zibafasha gukomeza kwiteza imbere mu mibereho yabo. Abafite ubumuga bashimiye ubuyobozi bw'Igihugu cyacu budaheza bukiriwe na Nyakubahwa Perezida wa Repubulika y'u Rwanda Paul Kagame.

Mu ijambo rye, Minisitiri w’Ubutegetsi bw’Igihugu Hon.MUSABYIMANA Jean Claude yashimiye abafatanyabikorwa bakomeje guharanira imibereho myiza y’abantu bafite ubumuga. Yashimiye kandi ubuyobozi bw'Igihugu ku isonga Nyakubahwa Perezida wa Repubulika ku kuzirikana no kwita ku burenganzira n'iterambere ry'abafite ubumuga. Yavuze kandi ko buri wese asabwa kugaragaza uruhare rwe mu gukuraho inzitizi abafite ubumuga bahura nazo zikurweho.

Ati: "Ni uruhare rwacu ni ukuba ijwi ry'abafite ubumuga kugira ngo uburenganzira bwabo bwubahirizwe no kubashyira muri gahunda zituma bazamura imibereho yabo kuko bagaragaje ko bashobotse kandi bashoboye". Yongeyeho ko Leta izakomeza guharanira ko abafite ubumuga badasigara inyuma bityo mu igenamigambi ryose bakaba bagomba kuzirikanwa.

Ibirori byo kwizihiza Umunsi Mpuzamahanga w'abantu bafite ubumuga byaranzwe n'ubusabane n'umukino w'umupira w'amaguru w'abafite ubumuga (amputee football) wahuje ikipe y'Akarere ka Nyarugenge na Ngoma.