Mu rwego rwo kwizihiza Umunsi Mpuzamahanga w’Umurimo usanzwe wizihizwa buri mwaka tariki ya 1 Gicurasi, Akarere ka Ngoma kahaye icyemezo cy'ishimwe Umukozi w’Indashyikirwa mu rwego rwo gushishikariza abakozi gukomeza gutanga serivisi inoze ku baturage.

Umukozi wahize abandi bakozi mu Karere ka Ngoma ni Bwana ZIGAMA Titien, usanzwe ari umukozi w’Akarere ka Ngoma ushinzwe Ubwisungane mu Kwivuza (Mutuelle de Santé). Yatoranyijwe hashingiye ku bikorwa bye by’indashyikirwa, harimo umurava mu kazi, ubwitange, ubunyangamugayo, kwihutisha serivisi zihabwa abaturage no guhanga udushya.

Abakozi bakorera ku cyicaro cy’Akarere ka Ngoma bahawe ikiganiro kijyanye n’imyitwarire mbonezamurimo cyatanzwe na INGABIRE Benoit, Umunyamabanga Nshingwabikorwa w’Akarere, agaruka ku ndangagaciro zikwiye kuranga umukozi wa Leta, zirimo ubunyangamugayo, gukunda umurimo, kubaha inshingano no gukorera abaturage kinyamwuga.

Umunyamabanga Nshingwabikorwa w'Akarere INGABIRE Benoit yatanze ikiganiro kijyanye n'imyitwarire mbonezamurimo.

ZIGAMA Titien, nyuma yo guhabwa icyemezo cy'ishimwe yashimiye abakozi bagenzi be bamugiriye icyizere bakamutoranya nk’indashyikirwa guhera mu kagali kugeza ku rwego rw’Akarere. Yagize ati:

“Ni ishema rikomeye guhabwa iki gihembo. Ndabashimira mwese kuba mwahisemo kungirira icyizere cyo kuntora nk’umukozi w’indashyikirwa byose ndabikesha ubufatanye bwanyu ndabizeza ko nzakomeza guharanira ko abaturage bacu babona serivisi nziza no gushaka icyatuma bakomeza kwishimira serivisi bahabwa igihe batwiyambaje.”

Mu ijambo rye, Madamu NIYONAGIRA Nathalie, Umuyobozi w’Akarere ka Ngoma, yashimye uruhare rukomeye rw’abakozi mu guteza imbere abaturage b’Akarere ka Ngoma. Yagize ati:

“Umunsi nk’uyu ni umwanya wo gushimira abakozi bose ku ruhare rwabo mu iterambere ry’igihugu no guteza imbere abaturage b’Akarere kacu, ariko by’umwihariko tukagaragaza ko gukora umurimo unoze bifite agaciro. Ndasaba abakozi bose gukomeza kuba intangarugero no gutanga serivisi zinoze zituma abaturage bacu bishimira ibyo tubakorera kuko badahari natwe ntabwo twaba turi mu kazi kuko umuturage niwe mukoresha wacu nk’abakozi b’inzego z’ibanze.”

Umuyobozi w'Akarere Madamu NIYONAGIRA Nathalie yasabye abakozi kunoza ibyo bakora no gutanga serivisi nziza ku baturage.

Iki gikorwa cyabaye umwanya wo kongera gushimangira ko umurimo unoze ari inkingi y’iterambere rirambye, kandi ko gushimira abakozi b’indashyikirwa bituma abandi barushaho gukorana umurava no gukunda ibyo bakora.

Uretse kuba ZIGAMA Titien yahawe icyemezo cy’ishimwe, biteganyijwe ko ifoto ye irashyirwa kuri website y’Akarere ka Ngoma mu gihe kingana n’umwaka 2024/2025 akaba asimbuye UWIMPUHWE Laeitia wabaye umukozi w’indashyikirwa mu mwaka 2023/2024

Umuyobozi w'Akarere wungirije ushinzwe imibereho myiza y'abaturage Madamu MUKAYIRANGA Marie Gloriose yasabye abakozi gutanga serivizi nziza ku baturage.

UWIMPUHWE Laetitia wari indashyikirwa mu mwaka 2023/2024 yashyikirije icyemezo cy'ishimwe ZIGAMA Titien umusimbuye