Tariki ya 29/04/2017, ni uwa gatandatu wa nyuma w’ukwezi  kwa Mata. Nk’uko bisanzwe ni umunsi w’umuganda mu Gihugu hose. Ubuyobozi bw’Akarere ka Ngoma bwagiye kwifatanya n’Abaturage hirya no hino mu Mirenge, uyu muganda ukaba warabaye by’umwihariko umuganda wo kurwanya icyonnyi cya nkongwa.

Ku rwego rw’Akarere, umuganda wakorewe mu Murenge wa Mugesera. Umuyobozi w’Akarere ka Ngoma, Bwana NAMBAJE Aphrodise ari kumwe n’Abayobozi b’Ingabo harimo Umuyobozi w’Ingabo mu Turere twa Bugesera, Kirehe na Ngoma Col. Bertin  Mukasa CYUBAHIRO, Umuyobozi w’Akarere Wungirije ushinzwe imibereho myiza, Madame KIRENGA Providence n’abakozi b’Akarere, bifatanyije n’abaturage gutera umuti wica nkongwa no kuzitoragura mu mirima y’ibigori yo mu Mudugudu w’Inunga, Akagari ka Nyange.
Uyu muganda ukaba waragaragayemo Ingabo nyinshi cyane dore ko kuva icyo cyonnyi cya nkongwa cyagaragara, Ingabo ziyemeje gufatanya n’abaturage nk’uko bisanzwe, mu kukirwanya. Muri ibi bihe turimo by’Icyumweru cy’ibikorwa by’ingabo(Army Week), Ingabo zifatanyije n’abaturage mu mirenge yose uko ari cumi 14 igize Akarere ka Ngoma mu gikorwa cyo kurwanya iki cyonnyi cya nkongwa, cyibasiye ibigori.

Nk’uko bisanzwe, nyuma y’umuganda, hatanzwe ibiganiro binyuranye bikurikira:
-    Ikiganiro cyo kurwanya nkongwa, ubuhinzi no kwita ku musaruro;
-    Ikiganiro ku mutekano muri rusange;
-    Ikiganiro ku matora;
-    Ikiganiro ku bwisungane mu kwivuza;
-    Ikiganiro mu mikoreshereze y’ubutaka;
-    Ikiganiro mu munsi mpuzamahanaga w’umurimo;
-    N’ikiganiro mu misoro n’amahoro.

Muri ibi biganiro byose abaturage bakanguriwe kugira ubufatanye mu bikorwa, bibateza imbere, gukora umurimo unoze, gutanga amakuru anyuranye ku gihe, ariko basabwa kwitabira gukorera mu matsinda anyuranye atuma bahuza imbaraga, cyane cyane amasibo, ahuza ingo cumi n’eshanu.
By SIBOMANA Jean Bosco
PRMCO/Ngoma